1 John 2 - BAIBEL (BSI)

Nikukuphuu Khristo

¹ Itianuliqo,ino hipau nongu lau yepuwu ani, tishianguno nongu pelo axine shipemo niyeke, ikemu nongu gholo khualano axine shiaye, Apu vilo nizuqhushi qhuinijutsu nikemi milakhi ani, pa ye amikuchou Jisu Khristo ke.

² Khristo ye nixineqo pevetsu nikeu ghenguno aghakishiuke, eno nixineqo ghengu likhi kumoe ikemu ayeghilomi kumtsu xineqo ghenguno ghike.

³ Ninguno Alhou no ahza tsukeu papelu aye tileno ninguye pa ithitoilu ani kepi mutsuqheyilu ani.

⁴ Timi khuno,”Niye pa ithitoi ani” ipi puzu pano ahza tsukeu papemoni keno pa ye kimkimi lakhie eno pa lolo kuchou kuhae.

⁵ Ikemu khuno pa tsa papeluni keno timi tipau lolo kuchouno Alhou kimiyechekeu shikupulu ani. Ninguye Alhou gholo xukimelu akeu mutsuqheyi shilunikeuye hipauke:

⁶ khunono paye Alhou gholo xukimepe acheni ipini keno paye Jisu Khristo no kishi xukeno titoi pa ghi xukepue.

Ahzakutsu Akithe

⁷ Kimiyechekemiqo, niye ahzakutsu akithe nongu lau yepuwu anike kumoe, ikemu ahzakutsu aqau khikhi inahu abothu lono nonguno pechekeno tipauke. Ahzakutsu aqauye nonguno chiluvekeu tsape huke.

⁸ Tishipimu niye nongu lau ahzakutsu akithe yepuwu ani, kughengu tipauye Khristo lolo eno nongu lologhi kuchou akeu huke. Kughengu akuzuye wove ani eno kuchou kuvu huye vu ipecheae.

⁹ Timi khunono paye akuvulo acheni kepi picheni puzu pa thikuzumi jumithini keno paye akuzulo aphie.

¹⁰ Khunono pa thikuzumi kimiye cheni keno paye akuvulo acheni eno pa loloye timi pelo kupuxalukepu kuhae.

¹¹ Ikemu khunono pa thikuzumi mithi cheni keno paye akuzulo ani akuzulo checheni eno paye khilau wucheni keno tipau mthae kughengu akuzuno pa nhethi kighichevetsu ake.

¹² Itianuliqo, niye nongu lau yepuwulu ani, kughengu Khristo jelono nongu xineqo pevetsu kehu.

¹³ Apunoqo, niye nongu lau yepuwulu ani, kughengu abothu lono acheghikeu hu nonguno ithi ani. Lhothemiqo, niye nongu lau yepuwulu ani, kughengu nonguno Alhoksau shou theqhiluveke.

¹⁴ Itianuliqo, niye nongu lau yepuwuluve kughengu nonguno Apu ithi anike. Apunoqo, niye nongu lau yepuwue kughengu inahu abothu lono acheghi keu hu nonguno ithike. Lhothemiqo, niye nongu lau yepuwulue kughengu nonguye mutotoike eno Alhou tsa nongu lolo ake eno nonguno Alhoksau shou theqhiluveke.

¹⁵ Ayeghiqha momu tile kiu ani keno tipaqo laumi kimiye kevilo. Khunono ayeghiqha kimiye cheni keno Apu kimiyeni keu pa lolo kuhae.

¹⁶ Kughengu ayeghiqhalo akeu laumi, ti ashiajino mineche keu, anhethino ithukulu mineche keu eno akuxulo pighi aghi keu qhekuza jeli kumtsu Alhou launo ighimoe, ikemu ayeghiqha launo ighike.

¹⁷ Ayeghiqha eno tipaulo mineche keu jeli kumtsu wove ani ikemu timi khunono Alhou pulou shi cheni keno alhokupuju xu acheni.

Khristo Kimthiu

¹⁸ Itianuliqo, ashekha tsala kupunuvae. Nongu vilo Khristo Kimthiu ighi nani kepi piche kehu itehiye Khristo Kimthimi kutomo ipeghivae, tighenguno ashekha tsala kupunuvea kepi nino ithie.

¹⁹ Timi hipaqoye kuchouno niqonihomi kumoe ikehu ningu launo wuvae. Panonguye niqonihomi keaye panonguye nigholo ngo aghini cheke. Ikemu panonguye wuvae, tipau kiqiye panonguye niqomi kumo kepi mutsuqheyi ithive peniyeke.

²⁰ Ikemu nonguye Aghungu Kimthe pesu nongu shou lepukutsue eno nongu kumtsuno kuchou ithi ani.

²¹ Tishiaye ino nongu lau hipau yelu akeuye nonguno kuchou mthake ghenguno kumoe ikemu nonguno ti ithi ani kehu eno nonguno ithi akeu toi kuchou lauye akimki khilemu ighi chemoe.

²² Tishiaye, akimkiuye khuu kya? Tiye timi khunono Jisu ye Mesiya kumo kepi pini keno timi tipauye Khristo Kimthiuke. Paye Apu eno Anu milive cheni. Paye Apu eno Anu milive cheni.

²³ Kughengu khunono Anu miliveni keno Apu ghi milive anike eno khunono Anu ikhiluni keno Apu ghi ikhilu ani.

²⁴ Nonguno abothu lono kiu tsape chiluve akeno tipau nongu mlolo qhipua chelo. Nonguno tipau tsape qhipua cheaye nonguye Anu ngo Apu gholo xukimepe ache nani.

²⁵ Khristo no ningu tsunike piqhipua keu huye lhokta kuxuke.

²⁶ Khunono pishiqhiniye shiani keno tipaqo ghili ino nongu lau yelu ani.

²⁷ Ikemu Khristo no Aghungu Kimthe nongu shou lepuku tsukeu nongu lolo acheni, ikehu timi khunomu nongu shika akepu nonguye avehupu shiamoe. Kughengu pa Ghungu Kimthe no thwokhalo nongu shika nani, eno pano shika keu huye kuchouke, kichileu kumoe. Tishiaye Aghungu no nongu shika keu lulo eno Khristo gholo xukimepe achelo.

²⁸ Iye itianuliqo, pa gholo xukimepe achelo tishianguno kughou pano ipeghini keno ningu mlo kuloghipu shilupenike eno pano ighike Tsalalo ninguye kujo kelauno itshuwuvemo nani.

²⁹ Khristo ye achipiu kepi nonguno ithi ani, tishiaye khunono achipi kiu keno tipau shi cheni aye paye Alhou no nuli kepi nonguno ithi kepue.