1 John 1 - BAIBEL (BSI)

Akuxupu Tsa

¹ Inahu abothu lono akuxupu Tsa khipau acheghi, nino chilu, ninhethino ithulu,nino jupukulu eno niuno bulukeno tipau ghili nongu lau yelu ani.

² Kughono akuxupu hu pephetsu keno nino tipau ithulu eno tipau shepe shike eno Apu gholo lhokta kuxupu ache puzu nilau pephetsu keu hu tipau pesu nongu lau asheshu ani.

³ Khipau nino ithulu eno chiluve keu ghili nongu lau pikulha ani, tishianguno nongu pelo nigholo kuposhulu peniyeke. Ninguno Apu ngo paNu Jisu Khristo ishi sasu kuposhulu acheni.

⁴ Nino hipau yelu akeuye ningu lokivi shikupulu peniyeke.

Alhou ye Akuvu

⁵ Ninguno Anu launo atsape hipau chilu keu nongu lau pikulha ani, ike Alhou ye akuvuke eno pa gholoye khilemu akuzu kuhae.

⁶ Tishiaye, ninguno akuzulo cheche pulaghi ninguye pa gholo kuposhulu ani kepi aye, ninguye miki ani eno kuchou kiqi lono xuchemoe.

⁷ Ikemu pano akuvulo ake toi ninguno akuvulo checheni aye, ninguye lakhino lakhi sasu kuposhulu ani eno PaNu Jisu jino axine kumtsu launo ningu shikimthe tsu ani.

⁸ Ninguye axine kuha kepi ninguno pi aye nilikhi ni pishiqhi ani eno nilolo kuchou kuhae.

⁹ Ikemu ninguno nixineqo Alhou vilo pipheluaye, paye pukhukulupu eno achipiu shi cheni, pano nixineqo pevetsu nani eno alhoksa kumla kumtsu launo nishikimthe nani.

¹⁰ Ninguye axine shichemo kepi piaye, ninguno Alhou pesu akimki shivetsu ani eno nilolo pa tsa kuhae.