Zakalia 7 - Bibilia Ilagano Lya Kale 2015

Ū SEEBA ayejiwe shigongo ītī kūfunga

¹ Mu ng'waka gwa kanè gwa būsugi wa Ntemi Dalio, mhayo go ng'wa SEEBA gūkang'wizīīla ū Zakalia, lwalī lūshikū lwa kanè ng'weji gwa kenda, ūyo gūkitanagwa gwa Kisileu.

² Banhū ba Beeseli baalī bantūma Sheleza na Legemu-Meleki, hamò na banhū babo kūjūng'wikūmbīlīja ū SEEBA;

³ būbabūūja a bagabīji ba mu numba ya ng'wa SEEBA wa Būdūla bose, na a bahangi; būhaya, “Twikale ū mu shīmīle sha kūlīla ng'hūngū na kūfunga mu ng'weji gwa katanò, ūmo tūkīītīlaga būlī ng'waka nose myaka yakwīlaga?”

⁴ Hūna ū mhayo go ng'wa SEEBA wa Būdūla bose gūnizīīla gūlīhaya:

⁵ “Babūūjage pye a banhū ba sī yenīyī na a bagabīji; gīkī, ‘Ū ng'wikanza lya myaka makūmi mpungatī īyo yabīta, ūlū ng'wafunga ū mu ng'weji gwa kantanò na gwa mpungatī, kūnū mukūlīlaga na ng'hūngū, ng'wafungaga kūlwa nguno yane gete?

⁶ Nūūlū mukūlyaga na kūng'wa, ng'walī mutalyaga na kūng'wa kūlwa nguno ya kwiyeja bing'we dūhū?

⁷ Ī mihayo yenīyī ītī h'ī yene īyo SEEBA wīhaya mu nzīla ya bahangi ba kale aho nzengo gwa Yelusalemu, nī mizengo ya bbihī nago yalī ītaalī mu kwifuula na būsabi, nī litogolo lya Negevu, nī sī ja magūlya ga ng'weli jalī jitaalī na banhū?’”

⁸ Ū mhayo go ng'wa SEEBA gwiza hangī ū kūlī Zakalia gūlīyomba:

⁹ “Ū SEEBA wa Būdūlū bose alīhaya gīkī, ‘Goloolagi ū mu kalamulīle king'we, hangī mubize na shigongo na kwisaatwa būlī munhū na biye.

¹⁰ Yaya ū kūbiboneela a bachīlwa nūūlū a bapīna, balobeji na a bahabī. Yaya ū kwiyiganikīla yabūbi ū mu ng'holò jing'we būlī munhū na ng'wiye.’

¹¹ “Gwike bakalema ū kūdīlīla; bīīta ntwe ndiimu, būgalūka bajile bichibījaga a matū gabo.

¹² Būgang'hanaja ī ng'holò jabo, jūdaama no gīt'iwe, būlema ū kūshidegeleka ī shilagīlo nūūlū ī mihayo īyo Seeba wa Būdūla bose wītūmaga mu nzīla ya ng'wa Moyo wakwe kūbītīla mū bahangi a ba kale. Hūna lūūlū ū SEEBA wa Būdūla bose akapelana no.

¹³ “Aho naahīlīka baalī baalema ū kūdegeleka, hūna lūūlū aho bitana nane natadegelekile.” Alīhaya SEEBA wa Būdūla bose.

¹⁴ “Nakabatūmīla nshūūlūlū nūbasambaagīja kū mahanga gose, ayo gaalī mageni ū kūbo. Ī sī ū kū numa yabo yūbiipa, yūsaaga buyīkī; ndūhū na wa kūbīta bīta mo nūūlū hado. Ī sī yalī yawiza, alīyo bīyenheleja kūbiza buyīkī mu gīko.”