Zakalia 3 - Bibilia Ilagano Lya Kale 2015

Ngabīji ntaale Yoshwa

¹ Hūna ūnoolekeja Yoshwa, ūyo walī Ngabīji Ntaale; walī wīmīīla kū būtongi bo ng'wa malaika o ng'wa SEEBA. Na Shetani walī wīmīīla ū kū lwande lokwe lwa būlyo kūlwa kūmūūla.

² Ū SEEBA ūng'wīla ū Shetani, “Ū SEEBA ni akūhamage Shetani! Ū SEEBA ūyo wīsolile ī Yelusalemu, ni akūhamage! Ū munhū ng'wenūyū abange līshitinde lya moto lyasapulagwa kwīnga mu moto gūkūbakaga!”

³ Ū Yoshwa aho īmīīlile ū kū būtongi bo ng'wa malaika walī azwalile shizwalo shisoso.

⁴ Ū malaika ūbawīla abo baalī bīmīīla kū būtongi bokwe, “Ng'wīngījagi ī shizwalo shakwe ī shisoso.” Hūna ūng'wīla ū Yoshwa, “Ūlībona gīkī nakwīngīja ī shibi shako, hama nakūkūzwīka shizwalo shingī nasho shawiza.”

⁵ Naane nūhaya, “Ntūūlīlagi shikooye ū kū ntwe gwakwe.” Na ng'hana būntūūlīla shikooye shawiza ū kū ntwe gwakwe; nī shizwalo būnzwīka ū malaika alīho hoi alolile.

⁶ Hūna ū malaika o ng'wa SEEBA ūnagīla ū Yoshwa alīhaya:

⁷ Ū SEEBA wa Būdūla bose alīhaya gīkī, “Ūlū ūshimīzīla ū mu nzīla jane, nī yīyo nīhayile wīdima, ūkūbiza nsugi wa numba yane, na a mabīndo gayo ūkūgalang'hana; hama nakūkwinha wiyaabī kūyeela yeela hamò nabo abo bīmīīlaga henaha aba.

⁸ Degelekaga bebe Ngabīji Ntaale Yoshwa, na a biyo abo bigashaga kū būtongi wako, abo balīho kūlwa koolecha lūmeng'ho lwa mihayo īyo īlī hihī kwilonga: Ū nene nakūng'wenha Ntūmami wane, ūyo alī Itambī.

⁹ Līlolagi ī liwe īlo naalītūūlaga kū būtongi bo ng'wa Yoshwa! A h'iwe ī līmò lyenīlo galīho miso mpungatī; nīyo a higūlya yalyo nakwandīka wandīke,” alīhaya SEEBA wa Būdūla bose, hūna ī shibi sha sī īyī nakūshīnja mu lūshikū lūmò.

¹⁰ Ū mu lūshikū lwenūlo būlī ūmò wing'we akūng'wegeleja nzenganwa ng'wiye ize kwigasha mu mbeho ya nzabibu na ntiini gwakwe. Alīhaya SEEBA wa Būdūla bose.