Zakalia 12 - Bibilia Ilagano Lya Kale 2015

Kūkenaagūlwa kwa banishi ba Yelusalemu

¹ Ūyū gwene mhayo go ng'wa SEEBA kūlwa sī ya Isilaeli, ū SEEBA ūyo walyamba ī ligūlū, nū nsingi gwa sī ūgūtūūla we, hama hū ng'wene ū meeja wa moyo ūyo gūlī mu gatī ya ng'wa munhū; ū ng'wenūyo alīhaya gīkī,

² “Ī Yelusalemu nakwīyīta ībize shikombe sha kūgenheleja kūlelengeta a mahanga ga banhū ayo galī hihī hihī; ī Yuda īkūpīndiwa, pyī nī Yelusalemu.

³ Ū mu lūshikū lwenūlo a mahanga ga mu sī a gose ūlū gibilinga kwilwisha nī Yelusalemu, nakwīyīta ībize iwe idito, īlo lītūdūla kūsegejiwa na mahanga gose. Abo bakūgema kwīsegeja bakwiminya boi benekīlī.

⁴ Ū mu lwise lwenūlo būlī falasa nakwīgwisīja ng'hahū, na būlī ndamhīji wayo lūsalo.” Alīhaya SEEBA. Alīyo nakwikala miso kūlwa kwīlang'hana ī numba ya Yuda, ī falasa ja mahanga ī jene nakūjibbokuja pyī ī jose.

⁵ Hūna a batongeeji ba Yuda bakūhaya ū mu ng'holò jabo gīkī, “A banhū ba mu Yelusalemu balī na nguzu, nguno ū Seeba wa Būdūla bose hū ng'wene ū Mulungu wabo.”

⁶ Ū mu lūshikū lwenūlo a batongeeji ba Yuda bakūbiza gītī moto gūkūmeenyaga h'ikīgo lya ng'hwi, nūūlū gītī chenge sha moto shilī ha shise sha būsīga būgesile. Bakūbanogoteja a banhū abo babapīndije, abo balī kū būlyo wabo nū kū lūmoso lwabo; alīyo ī Yelusalemu īkūsaaga h'ūmo īlī dūhū a h'ipande lyayo.

⁷ Ū Seeba akūjipīja tame ī kaya ja mu Yuda, hūna lūūlū ī likūjo lya banhū ba numba ya ng'wa Daūdi na ba Yelusalemu lītūbiza itaale kūtinda ī lya banhū ba Yuda.

⁸ Ū mu lūshikū lwenūlo ū Seeba akūbalang'hana a bikaji ba mu Yelusalemu, nīyo bakūbiza na nguzu no; ū ngokolo wa bagokolo ū mubo akūbiza gīt'ūmo walī Daūdi, ī numba ya ng'wa Daūdi īkūbiza gītī Mulungu, gītī Malaika o ng'wa Seeba alī kū būtongi wabo.

⁹ Ū mu lūshikū lwenūlo nakūfuma naje nakūgakenaagūlaga a mahanga a gose ayo gakwīdumīlaga ī Yelusalemu.

Kūnīlīīla Ūyo bakanchima

¹⁰ “Nīyo ī numba ya ng'wa Daūdi na a bikaji ba mu Yelusalemu nakūbitīīla Moyo wa shigongo na wa kūbagunanha kūlomba mu kwikūmbīlīja. Bakūnilola, ū nene ūyo bakanichima, hūna bakūlīla gītī munhū akūnīlaga ng'wana wakwe ūmò dūhū, hangī bakūpīnīhala no gītī kūpīnīhala kwa munhū kūlwa ng'wana wakwe ngosha tangī.

¹¹ Ū mu lūshikū lwenūlo kūkūbiza ho kūlīla kūtaale no ū mu Yelusalemu, gītī kūlīla kwa mu sī ya Hadadi-limoni kū mbūga ya Megido.

¹² Ī sī īkūlīla ng'hūngū, nīyo būlī banhū mu lūdūgū lwabo, na a bake babo nabo būlī bene heke heke, a ba lūdūgū lwa numba ya ng'wa Daūdi na a bake babo, na a ba lūdūgū lwa numba ya ng'wa Nasani na a bake babo,

¹³ na a ba lūdūgū lwa numba ya ng'wa Lawī na a bake babo, na a ba lūdūgū lwa numba ya ng'wa Shimei na a bake babo,

¹⁴ nī ndūgū ījo jilīsaagīīla najo na a bake baajo.