Zakalia 10 - Bibilia Ilagano Lya Kale 2015

SEEBA kūbisagīja banhū bakwe

¹ Ū SEEBA nombagi ī mbula ū mu makanza ga mīsa, nguno ū SEEBA hū ng'wene akagabeejaga a malunde ga mbula. Ī mbula ya nzumbī akabatūmīlaga we a banhū, nī shisho shikazwaga mu matogolo kūlwa banhū bose.

² Ī shiikolile īsho shikalamiagwa shilī na mihayo ya kūlemba banhū, a bachūja bakabonaga mihayo ya nyalomolomo; bakahooyelaga ya shilooti sha kūlemba banhū, bakinhaga būlūngūja būtī na fiilū. H'ī chene a banhū bakatagaalījaga bajile sagala gītī ng'holo, bakiboneelagwa kūlwa kūgayiwa ndīīmi.

³ Ū būpelanu bone būbapembekelile no a badīīmi, a batongeeji nakūbagwisīja nsango; nguno ū SEEBA wa Būdūla bose akūlīdīlīla wei ī lidaale lyakwe, h'ī numba ya Yuda; akūbīīta babize gītī falasa mhyeeni mu būlūgū.

⁴ Ū kūfuma mu Yuda līkwilonga iwe lya kūgoloolela numba, ū mulī we lūkwilonga lūmambo lwa kūlang'hana iheema, ū mulī we būkwigela būta bo kūlwīīla mu būlūgū, būlī nsugi akūfuma mulī we.

⁵ A bose bakūbiza gītī bagosha ba nguzu bakūpandagīlaga tembe mu mapanda makanza ga būlūgū. Nīyo īkī ū SEEBA alī hamò nabo, ū mu kalwīīle kabo bakūbagoola a badamhīji ba falasa.

⁶ Ī numba ya ng'wa Yuda nakwīguzuhya, Ī numba ya ng'wa Yosefu nakwīpīja. Nakūbashosha hangī kū kaya, nguno nabasaatilwe. Bakūbiza gītī naalī natabalemile, nguno nalī SEEBA Mulungu wabo, ū mu kwitana kwabo nakūbidīka.

⁷ A Baefulaimu bakūbiza na nguzu gītī bashilikale, ī ng'holò jabo jikūzalabana gītī bang'wi ba divai. A baana babo bakūbona bayege, Ī ng'holò jabo jikūnyegela SEEBA.

⁸ Nakūbitana bibilinge mu sī yabo, na ng'hana nakūbapīja; bakūkwīla no babize gīt'ūmo baalī Ī kwandya.

⁹ Nūūlū nabasambaagīje kū mahanga ga banhū, alīyo nahene bakūniizūkwa nūūlū ū kū sī ja kūle. A boi na a baana babo bakūpīla, bakūshoka dūhū.

¹⁰ Nakūbashosha ū kūfuma ī Misili nī Ashulu nakūbabilinga nabīnje ko, nabenhe Gileadi na Lebanoni kūshisha ū ng'wanya gwa kwikala gūtūbiigela.

¹¹ Bakūbīta mu nyanza ya makoye, alīyo ū kūlibangūka kwa nyanza kūkūlembeela, nū mongo gwa Nile gūkūkama hamò na būshimu wago. Ū wikumīlīja bo Ashulu būkwichiwa hasī, nū būsugi bo Misili būkūbīta.

¹² Nakūbaguzuhya mulī SEEBA, na bakūshimīza mu būdūla kūlwa lina lyakwe. Alīhaya SEEBA.