Zabuli 99 - Bibilia Ilagano Lya Kale 2015

Ū SEEBA alī Ntemi ntaale

¹ Ū SEEBA hū ng'wene ū nsugi, a banhū ni bazugumage; alī h'isumbī lyakwe lya būtemi igashije ha gatī ya makelubi; Ī sī ni īdetemage.

² Ū SEEBA alī ntaale ū mu Sayuni, alī higūlya no ya mahanga ga banhū bose.

³ Ni balīkumīlījage ī lina lyako, Īlo līlī lya kogohya, nguno līlī lyeela.

⁴ Ū Ntemi alī na nguzu, na atogilwe būtūngīlīja, ū būtūngīlīja ūkūwinhaga nguzu; ū Yakobo wang'wītīlile ya longe, hangī ītūngīlīgije.

⁵ Nkūjagi ū SEEBA Mulungu wise, lamyagi a h'isumbī lya kūtūūla mhambala jakwe; nguno ū we alī ng'wela.

⁶ Musa na Alooni baalī bamò ba bagabīji ba ng'wa SEEBA, nū Sang'weli walī ūmò wa babo baalitanaga ī lina lyakwe; banīlīīlaga nang'hwe wabashokeja.

⁷ Walūngalūngaga nabo n'ilaka kūfuma mu ng'hīngī y'ilunde; baalī babūdīlīlile ū būkaanīji wakwe, na a malange ayo walī wabinha.

⁸ Ee SEEBA, Mulungu wise, na ng'hana ū bebe wabashokejaga; ū kūbo walī Mulungu ūyo akalekejaga, nūūlū īkī wabataalaga ūlū bahūba.

⁹ Nkūjagi ū SEEBA, ū Mulungu wise, lamyagi a ha lūgūlū lwakwe lwela; nguno ū SEEBA Mulungu wise alī ng'wela.