Zabuli 98 - Bibilia Ilagano Lya Kale 2015

Kūnkumīlīja SEEBA kūlwa būtūngīlīja bokwe

¹ Ng'wīmbīlagi ū SEEBA lyīmbo ipya, nguno wītile mihayo yakūkumya no; ū nkono gwakwe gwa būlyo, ūyo gūlī nkono gwakwe ng'wela, gwampandīkīlile būpyeni.

² Ū SEEBA waboolekije ū būpīji wakwe, ū būtūngīlīja wakwe waboolekije hape ū kū mahanga.

³ Wawizūkilwe ū būtogwa wakwe, nū būsanyiwa wakwe ū kū numba ya Isilaeli; ū būpīji bo ng'wa Mulungu wise wamanikile a banhu bose babubonile mu sī jose.

⁴ Ntūlīlagi mhūndū ū SEEBA, bing'we sī jose; hīlīīlagi no no no, ng'wīmbe mu būyegi na kūgongoola.

⁵ Ng'wīmbīlagi ū SEEBA, mungongoole bo kūtūla ndono; ng'wīmbe mukūhoolejaga na malaka ga ndono.

⁶ Fuulagi mbiilūlū kūnū mukūlījaga na mhembe, tūlagi mhūndū ū kū būtongi bo ng'wa SEEBA, hū ng'wene ū Ntemi.

⁷ Ī nyanza īlundume pyī nī shisho shilīmo, nī sī īyoganye hamò na a bikaji baamo.

⁸ Ī myongo yikūbe ng'hūbi, Ī ngūlū jihoolanīje kwīmba kūlwa būyegi,

⁹ ū kū būtongi bo ng'wa SEEBA; nguno izile kwīlamula ī sī. Ī sī akwīlamula mu būtūngīlīja, na a banhū mu ng'hana.