Zabuli 97 - Bibilia Ilagano Lya Kale 2015

Būsugi na būdūla bo ng'wa SEEBA

¹ Ū SEEBA hū ng'wene ū nsugi, ī sī ni īsangabalage; a majinga ga kūle ni gayegage.

² Apīndiwe malunde na giiti sha gamha, būtūngīlīja na kalamulīle ka ng'hana shilī nsingi gw'isumbī lyakwe lya būtemi.

³ Ū kū būtongi wakwe gūlīko moto, gūkūjaga gūbanogoteja a banishi bakwe abo bampīndije.

⁴ Ī ndabi jakwe jikwītiimīlaga ī sī; Ī sī īkūbonaga yazuguma.

⁵ Ī ngūlū jikwaabaga gītī būgondo ū kū būtongi o ng'wa SEEBA, ū kū būtongi bo ng'wa Seeba wa sī jose.

⁶ A mapandī g'igūlū gakūkumūchaga būtūngīlīja wakwe, na a banhū bose bakūlībonaga ī likūjo lyakwe.

⁷ Leka bagooke pye a balamya ba shiikolile, abo bakikumīlīgījaga wilamīlīja kū mashikolo dalali.

⁸ Ī Sayuni īkigwaga yayega; a bashīke ba Yuda bakasangabalaga, kūlwa nguno ya būlamuji wako, Ee SEEBA.

⁹ Nguno ū bebe, Ee SEEBA, ūlī ntaale no, ūlī higūlya ya sī yose; ūlī ngūngūhiwa no no no kūtinda bamulungu bose.

¹⁰ Bing'we abo muntogilwe ū SEEBA būkolagwi ū būbi, nguno akabūbaladaga ū būpanga wa beela bakwe, na akabapījaga ū mu nkono gwa babūbi.

¹¹ Isana līkabaakīlaga a batūngīlīja, a ba ng'holò jigoloolile bakapandīkaga būyegi.

¹² Bing'we a batūngīlīja, yegelagi mulī SEEBA, na līkumīlījagi ī lina lyakwe lyeela.