Zabuli 95 - Bibilia Ilagano Lya Kale 2015

Kūngongoola na kūng'wigwa Mulungu

¹ Nzūgi tūng'wīmbīle SEEBA na būyegi, tūng'wīmbīlagi n'ilaka lya būyegi, ū Wei h'ī Shiganga sha būpīji wise.

² Twegeelagi kū būtongi wakwe mu kūlūmba, tūngongoolagi mu kwīmba na kūtūla mhūndū.

³ Nguno ū SEEBA alī Mulungu ntaale, na Ntemi ntaale kūkīla bamulungu bose.

⁴ Ī sī īlī mu nkono gwakwe, na a mapandī gayo a mashimu, nī neno ja ngūlū jilī jakwe.

⁵ Ī nyanza īlī yakwe nguno hū wei wībeeja, a makono gakwe h'ayo gībeeja nī sī ī nyūmu.

⁶ Bing'we, twinamagi tūnamye, tūtujagi mazwi kū būtongi bo ng'wa SEEBA, ū Meeja wise;

⁷ nguno hū ng'wene ū Mulungu wise, a bise tūlī banhū ba ng'widīīmīlo lyakwe, tūlī ng'holo ījo ajilang'hanile we. Ī lelo ūlū muliigwe ilaka lyakwe,

⁸ yaya ū kūgang'hanaja ī ng'holò jing'we, gīt'ūmo ng'wītīlaga ipandī lya Meliba, ūmo mukīītīla ng'wibbaala lya Masa.

⁹ Aho banigemaga a bakūlūgenji bing'we gīkī banibone, nūūlū īkī baalī bashibona ī shītwa shane.

¹⁰ Ī shibyalīlwe shenīsho nakashipelanīla, kūshisha ikanza lya myaka makūmi anè; nūhaya gīkī, “A banhū benaba balī na ng'holò jitalile, nī nzīla jane batajimanile.”

¹¹ Nose nakilahīla kūlwa būpelanu bone gīkī, “Batīko kwingīla ū mu kwifuula kwane.”