Zabuli 94 - Bibilia Ilagano Lya Kale 2015

Mulungu Namuji wa bose

¹ Ee SEEBA, bebe Mulungu ūyo ūkamalaga shiilī, Ee Mulungu ūyo ūlī maji wa shiilī, mulīkaga n'isana lyako.

² Būkaga, Ee Namuji wa sī jose, a bibonya ūbalīpe gīt'ūmo ībigeleelilwe.

³ Ee SEEBA, ni kinehe shi a bahūnga? A bahūnga bakūsangabala kūshisha nanalī?

⁴ Ū gwabo kwikala bakwitagūlaga mihayo yabo ya nyadoshi mu kwikumīlīja, pye a babūbi h'ūmo balī.

⁵ Ee SEEBA, bakūbasheedekejaga a banhū bako, bakūbiboneelaga no a banhū ba wingīji wako.

⁶ Bakūbabūlagaga a bachīlwa na a balobeji ba muumu; na a babo batī na basaabo bakūbayagajaga.

⁷ Bakūhayaga, “Ū SEEBA atībona ī yenīyī; ū Mulungu o ng'wa Yakobo atūdīlīla.”

⁸ Bing'we babbūūlī ba babbūūlī, chagūkagi; bing'we bachilū, ni mukūmisha nanali?

⁹ Ūyo wagūtūūla ho ū gūtū, ū wei h'alemeelwe ū kwigwa? Ūyo walībeeja ī liso, ū wei aduume ū kūbona?

¹⁰ Ūyo akahūgūlaga mahanga, akūduuma ū kūgahama? Ūyo akabalaganga banhū, ū wei abize atamanile?

¹¹ Ū SEEBA agamanile a maganiko ga munhū, amanile gīkī gatikīlile na kūdūhū.

¹² Ee SEEBA, alī na lubango ūyo ūkūng'hūgūla bebe, ūyo ūkūnanga kūfuma mu malange gako;

¹³ ūng'winhe kwifuula mu shikū ja makoye, kūshisha ichongo līsīmve kūlwa bahūnga.

¹⁴ Nguno ū SEEBA atīko kūbaponya a banhū bakwe, atūbaleka nūūlū hado a banhū ba wingīji wakwe.

¹⁵ Ū būlamuji būkwīmīīla ha būtūngīlīja hangī, hama pye a ba ng'holò jigoloolile bakūbūlondeela.

¹⁶ Nani akwīmīīla kūlwa nguno yane kwilwisha nabo a babūbi? Nani ūyo atogilwe kwīma hīgīyī kūlwa nguno yane ilwishe nabo a bakenaagūji?

¹⁷ Ū SEEBA ūlū ni atanigunanhile, Ī haha ū būpanga wane ni būlī mu sī ya bafu.

¹⁸ Aho nandya kūhaya gīkī, “Ū gūgūlū gwane gūlīchūūlūlūka,” ū būtogwa wako, Ee SEEBA, būkanīmīlīja.

¹⁹ Ī ng'holò yane ūlū yazwanganaga, ū kūlūngūja kwako kūkayejaga

²⁰ A basugi abo bahūbīkile, abo balī na kahelele ka kūtūūla mayanga, ū bebe ūkūdūla kwisheesha nabo?

²¹ A boi bakalomanaga mibi ya kūbīītīla a batūngīlīja, bakabalamulaga nsango gwa kūcha a banhū nūūlū batahūbile.

²² Alīyo ū SEEBA alī nang'hani wane ū nene, ū Mulungu wane hū ng'wene alī shiganga shane sha kūpīlīla.

²³ Ū būbi wabo akūbashokeja boi benekīlī, na a kūbayagaja kūlwa būhūbi wabo; ū SEEBA Mulungu wise akūbayagaja.