Zabuli 90 - Bibilia Ilagano Lya Kale 2015

SHITABO SHA KANÈ Zab 90–106 Mulungu wa welelo na welelo

Kūlomba kwa ng'wa Musa munhū o ng'wa Mulungu.

¹ Ee SEEBA, mu shibyalīlwe shose ū bebe h'ūlī ipandī lise lya kwikala,

² Kūfuma aho ngūlū jitaalī kūbyalwa, nūūlū aho sī na shiseeng'wa shose ūtaalī kūshisūmba, ū bebe ūlīho, ūlī Mulungu kūfuma welelo kūshisha welelo.

³ Ū munhū ūkanshoshaga mu lūbuubu; ūkahayaga gīkī, “Bing'we baana ba banhū, shokagi mu lūbuubu!”

⁴ Nguno ū mu miso gako ī myaka shihūmbī Īlī gītī lūshikū lw'igolo ūlo lwabītile, nūūlū gītī būjikū būmò kwangalūka.

⁵ Ūkabapulaga wangū a banhū, bakajaga gītī balī mu tūlo, ī dilū balī gītī maswa managana gakūsongaga;

⁶ ayo ī diilū gafulumile chiza, alīyo ī mhīndī gahihinyala gūūma.

⁷ Nguno tūkashilaga kūlwa būpelanu wako, nīyo ū būdaki wako būkatūdetemyaga.

⁸ Ū būkenaagūji wise ūwanikīlile hape kū būtongi wako; nī shibi shise sha mu mbisīla shilī ng'wisana lya būshū wako.

⁹ Ī shikū jise jikabītaga tūlī ha sīlīlī ya būdaki wako, ī myaka ya būlamu wise īkakalīkaga gīt'ikanza lya kwicha myūyī.

¹⁰ Ī shikū ja būlamū wise jilī myaka makumi mpungatī, ūlū tūbiza na nguzu tūkūshisha makūmi anaane; alīyo ī likanza lyenīlo lyokalile makoye na nduha dūhū; līkabītaga wangū no, twang'ula tūjile.

¹¹ Nani ūyo abūmanile ū būdūla wa būpelanu wako? Ū būpelanu wako būlī būtaale no gīt'ūmo līlī ī lyogohya lyako!

¹² Tūlangage ū kūjibala ī shikū jise; tūdūle kūpandīka ng'holò ya masala.

¹³ Ee SEEBA, shoshaga moyo; numho kūshisha nanalī? Bachīlage shigongo a batūmami bako.

¹⁴ Būlī dilū twigūtyage na būtogwa wako, tūdūle kūyega na kūzalabana shikū jise jose.

¹⁵ Twinhage būyegi shikū ningī gīt'ūmo watūtūlīlile, gīt'ūmo ū wingī wa myaka īyo twabonile būbi.

¹⁶ Ī shītīle shako shimanīke ū kū batūmami bako, nī likūjo lyako ū kū baana bako.

¹⁷ Ū wiza bo ng'wa Seeba Mulungu wise būbize hamò nīse, ī milīmo ya makono gise wīyinhe nguzu. Ee, īguzuhyage ī milīmo ya makono gise.