Zabuli 86 - Bibilia Ilagano Lya Kale 2015Kūlomba kūlang'hanwa Kūlomba kwa ng'wa Daūdi. 1 Ee SEEBA, nidegelekage ūnishokeje, nguno ū nene nalī ng'habī na ngayiwa. 2 Būlang'hanage ū būpanga wane, nguno nakūkūgije; ū bebe ūlī Mulungu wane, mpījage ū ntūmami wako ūyo akūsanije. 3 Nichīlage shigongo, Ee Seeba, nguno nakūkūlīlīīlaga līīmi bbu. 4 Būyejage ū būpanga wa ntūmami wako, nguno ū būpanga wane nalībūtūūla kūlī bebe, Ee Seeba. 5 Ee Seeba, ūlī wa shigongo na nekeja; ūlī na būtogwa būtaale kū bose abo bakūkūlīlīīla. 6 Ee SEEBA, kūdegelekage ū kūlomba kwane, kwigwage ū kwikūmbīlīja kwane. 7 Mu lūshikū lwa kūluhiwa kwane nakūkūlīlīīla, nguno ū bebe ūkanishokejaga ū kūlomba kwane. 8 Ū mu bamulungu bose atīho wa kūlenganījiwa na bebe, Ee Seeba; nūūlū shitīho shītīle sha kūlenganīla na shako. 9 Ee Seeba, pye a mahanga wagabeeja bebe; gakwiza gakūtugīje mazwi. Gakūlīkumīlīja ī lina lyako. 10 Nguno ū bebe ūlī ntaale, na ūkīītaga mihayo ya kūkamaaja; bebe wike hū ūlī Mulungu. 11 Ee SEEBA, nilangage ī nzīla yako, nane nakūdūla kūshimīzīla ū mu ng'hana yako. Tūūlaga gwīnda ū mu ng'holò yane, nakūbiza na logohano ū kū lina lyako. 12 Ee Seeba Mulungu wane, nakūkūkumīlīja na ng'holò yane yose; hangī nakūlīkūja ī lina lyako shikū jose. 13 Nguno ū būtogwa wako būlī būtaale no ū kūlī nene, wabūpīgije ū būpanga wane kūfuma mu kūlimu. 14 Ee Mulungu, banhū bibonya baanūbūkīlile, ibità lya biboneeji līkūkoobaga kūnibūlaga, banhū abo batakūdīlīlile. 15 Alīyo ū bebe, Ee Seeba, ūlī Mulungu nsaatwa wa banhū, hangī wa shigongo, na ndīzu kūpelana, hama ookalile būtogwa, na ūlī nsanyiwa no. 16 Nigalūkīlage, ūnoolekeje ī shisa shako, ng'winhage nguzu jako ū ntūmami wako; mpījage ū ng'wana wa ntūmami wako nkīma. 17 Ee Seeba, nīītīlage mhayo gwa koolecha wiza wako, abo banikolilwe babone, bagooke; nguno ūlīnigunanha, kūlwa kūnilūngūja. |
Sukuma Bible © Bible Society of Tanzania, 2019.
Bible Society of Tanzania