Zabuli 85 - Bibilia Ilagano Lya Kale 2015

Kūlombela ihanga līchīlwe shigongo

Kūlwa ntongeeji wa bīmbi; Zabuli ya bitūnja ba ng'wa Koola.

¹ Ee SEEBA, wīyoolekegije wiza ī sī yako, ū Yakobo wanshokegije mihayo misoga.

² A banhū bako wabalekegije ū būsobya wabo, nī shibi shabo ūshikundīkīja pyī ī shose.

³ Pyī ū būpelanu wako wabūpamīlile kūle, ū būkalī wako ū būtaale walekanile nabo.

⁴ Ee Mulungu mpīja wise, tūshokelage hangī, lekanaga nabo ū būpelanu ūbo ūlīnabo ū kū bise.

⁵ Ūkwikala ūtūpelanīlile kūshisha welelo bose? Ūkūdimana nabo ū būpelanu wako kūshisha shibyalīlwe shose?

⁶ Ūtūdūla ū kūtūhīmbūūcha hangī, gīkī a banhū bako bakūyegele?

⁷ Ee SEEBA, toolekejage ū būtogwa wako, nū būpīji wako ūtūnong'he.

⁸ Shiigeleelilwe nīyigwe īyo akwīhayaga ū SEEBA Mulungu; a banhū bakwe a beela akūhooya nabo ya mhola, gwike ni batizagūshoka kū malofu.

⁹ Na ng'hana ū būpīji wakwe būlī hihī nabo abo bang'ogohile, gīkī ī likūjo likale ū mu sī yise.

¹⁰ Ū būtogwa nū būshikanu shikūdimana, ū būtūngīlīja būkwibbipa na mhola.

¹¹ Ū būshikanu būkūbumbūka kūfuma hasī, ū būtūngīlīja būkūlola kūfuma ng'wigūlū.

¹² Alichene, ū SEEBA akūgaba ī shawiza, hūna ī sī yise īkūtwaja a matwajo gayo.

¹³ Ū būtūngīlīja būkūtonga kū būtongi wakwe, būkūjibeegeja nzīla ī mhambala jakwe.