Zabuli 84 - Bibilia Ilagano Lya Kale 2015

Kwīkūmbūla numba ya ng'wa Mulungu

Kūlwa ntongeeji wa bīmbi; ng'wilaka lya, “Gitisi.” Zabuli ya bitūnja ba ng'wa Koola.

¹ Ū wikalo wako būlī wawiza no, Ee SEEBA wa mabità!

² Ū būpanga wane būlī na ng'hūmbū, nīyo nakwikūmbagwa no kūbiza mu numba ya ng'wa SEEBA; Ī ng'holò yane nū mīlī gwane shikūnīlīīlaga Mulungu mpanga.

³ Ī noni ī swī īkapandīkaga mo wikalo, nī munhambī īkabeejaga mo chanjo, īkūje ng'hune jayo īlī hihī na ng'walīlo gwako, Ee SEEBA wa mabità, Ntemi wane na Mulungu wane.

⁴ Balī na lubango a bikaji ba mu numba yako; shikū jose bakīmbaga kūkūkumīlīja bebe.

⁵ Balī na lubango abo nguzu jabo jilī kūlī bebe, abo ng'holò jabo jizunije kūshimīza hamò nang'ho.

⁶ Nūūlū būbīta ng'witogolo lya Baka, līkūgalūka lībize ipandī lya nzwīlo ja minzī, nī mbula ya mīsa īkūleka mo malambo.

⁷ Bakongeja kūpandīka nguzu būlī lūshikū, kūshisha būlī ng'wene ashike Sayuni, kwibona na Mulungu.

⁸ Ee SEEBA, Mulungu wa mabità, igwaga ū kūlomba kwane; nidegelekage, Ee Mulungu o ng'wa Yakobo.

⁹ Ee Mulungu, nolage ūyo alī lūmūda lwise, būlolage ū būshū wa ng'witīīlwa maguta wako.

¹⁰ Īlī chiza no kūmala nūūlū lūshikū lūmò mu gwalugwa yako, kūtinda shihūmbī sha shikū ng'wipandī līngī lyose lyose. Īkūnibeelela ūlū nūbiza nang'hani ha nyango gwa numba ya ng'wa Mulungu wane, kūtinda kwikala mu maheema ga bakenaagūji.

¹¹ Nguno ū SEEBA Mulungu alī līīmi na lūmūda; ū SEEBA akabanong'haga wiza n'ikūjo. Abo shimīzīle yabo īgoloolile atīko kūbiima shikolo shawiza.

¹² Ee SEEBA wa mabità, alī na lubango būlī munhū ūyo akūsanije bebe.