Zabuli 83 - Bibilia Ilagano Lya Kale 2015

Kūlomba kūbapyena banishi

Zabuli ya lyīmbo lya ng'wa Asafu.

¹ Ee Mulungu, ūtahuumūlījage, yaya ū kūbiza sele, Ee Mulungu; lekaga ū kūlembeela.

² Ūlībabona a banishi bako ūmo baasambaagūkīlile, abo bakūkolilwe bakūshiimūlaga mu būdalahi.

³ Bakūbīītīlaga mibi mu nyasala sala a banhū bako, bakwikobyaga kūbasīīga abo ūbalang'hanile.

⁴ Bakwiwīlaga, “Bing'we tūbahūlūlagi pyī ī lihanga lyabo, ī līna lya ng'wa Isilaeli lītizikala līkwizūkīlagwa hangī.”

⁵ Bakūlyaga gwīnda īmò biyigwa; bakūlaganaga baalomana mu būsangī būmò kwilwisha nang'ho.

⁶ Banhū kūfuma mu ng'hambī ja Edomu, na Baishimaeli, Moabu, na ba mpanda go ng'wa Hagali;

⁷ na ba Gebaali na Amoni na Amaleki, na Filisiti, būyaga na bana Tulo.

⁸ Nose nī Ashuli yadimanile nabo, gīkī a balekwa Lutu bapandīke nguzu.

⁹ Nabo bīītage ūmo ūkabīītīla Bamidiani, ūmo ūkabīītīla ba Sisela na Yabini, kū mongo gwa Kishoni;

¹⁰ abo bakayagajiwa ipandī lya Endoli, būlaala hasī būbiza gītī maashi.

¹¹ A batongeeji babo bīītage babize gītī Olebu na Zeebu; na a bitūnja ba batemi babo bīītage babize gītī ba Zeba na Zalimuna,

¹² abo bakahaya gīkī, “Tūgadimagi a madīīmīlo, gabize gise, Īyo īlī sabo ya ng'wa Mulungu.”

¹³ Ee Mulungu wane, bagalūchage babize gītī lūbuubu kū nshūūlūlū; gītī meela gakūlajiagwa nyaga.

¹⁴ Ūmo būpī būkalīīlaga mapoolu, nūūlū ūmo ndali ja moto jikabakījaga ngūlū,

¹⁵ boolomyage gīko na nyaga gwako, badetemyage na nshūūlūlū gwako.

¹⁶ Bakundīkījage minala ū būshū wabo, kūshisha balīkoobe ī lina lyako, Ee SEEBA.

¹⁷ Leka bading'we minala na bazwangane ilalī; nīyo bache bagookile.

¹⁸ Bīītage bamane gīkī ū bebe, ūyo lina lyako ūlī SEEBA, h'ūlī bebe wike, Mulungu ūyo Alī Higūlya no, ūyo sī jose jilī ha sīlīlī yako.