Zabuli 80 - Bibilia Ilagano Lya Kale 2015

Kūlomba būgunanhwa

Kūlwa ntongeeji wa bīmbi; ng'wilaka lya, “Būlabo.” Zabuli ya būkaanīji bo ng'wa Asafu.

¹ Ee Ndīīmi wa Isilaeli, twigwage; bebe ūyo ūkantongeelaga Yosefu gīt'idaale lya ng'holo, ūyo wigashije ha gatī ya makelubi, Ī lisana lyako ni līmulīkage

² ū kū būtongi bo ng'wa Efaimu, Benjamini na Manase; jimishage ī nguzu jako wize ūtūpīje.

³ Ee Mulungu, tūshoshage; ū būshū wako ni būtwakīlage, tūdūle kūpījiwa.

⁴ Ee SEEBA, Mulungu wa mabità, ū kūlomba kwa banhū bako ūkūkūpelanila kūshisha nanalī?

⁵ Nguno wabalishije shilīwa sha shisoji, ūbinha na mabakuli ga shisoji bang'we.

⁶ Ū kū bazenganwa bise watwītile kūbiza shikolo sha gwikenejiwa, hama a banishi bise bakwiyineenelegejaga kūnū būtūseka.

⁷ Ee Mulungu wa mabità, tūshoshage; ū būshū wako ni būtwakīlage tūdūle kūpījiwa.

⁸ Bebe ng'wenekīlī ūkenha nzabibu kūfuma Misili, ūgapeeja a mahanga a gangī, hūna ūgūhamba ū goi.

⁹ Ūkagūlīmīīla nī ngese, gūūkūla; hūna gūkoma miji gūlandaala, gookala hose pyī ū mu sī.

¹⁰ Kūshisha ī mbeho yago yūkundīkīja ngūlū; a matambī gūkundīkīja na mitūndū mitaale.

¹¹ A matambī gūfuluma, gūūshika kū nyanza, Ī saapa jūsonga kūshisha jūshika kū Mongo.

¹² Hama nibūlī hangī wajikambagūlile ī ndugu ja kūgūlang'hana, nose pye a babīti bakwīyobaga ī mizabibu?

¹³ Na mhunu jikūfumaga kū masaka jiza kūgūkenaagūla, nīyo pyī ī shiinū ja mu mapoolu jikūgūlyaga.

¹⁴ Ee Mulungu wa mabità, tūshokelage hangī! Lolaga kūfuma ū ng'wigūlū, ūbone! Gūdīlīlage ū nzabibu gwenūyū;

¹⁵ ū nji ūyo wagūhamba na nkono gwako gwa būlyo, ī litambī īlo walīguzuhya bebe kūlwa nguno yako ng'wenekīlī.

¹⁶ Baagūsanzagūlile ū nzabibu gwako, būgūpemba na moto; ni būbayagajage ū būng'weku w'ikūjo lya būshū wako.

¹⁷ Alīyo ū nkono gwako ni gūnang'hanage ū munhū ūyo alī kū nkono gwako gwa būlyo; ū ng'wana wa munhū ūyo wangūngūhije bebe ng'wenekīlī kūlwa nguno yako.

¹⁸ Hūna lūūlū a bise tūtūgalūka tūkūleke hangī, twinhage būpanga, nise tūkūlīkumīlīja ī lina lyako.

¹⁹ Ee SEEBA Mulungu wa mabità, tūshoshage; ū būshū wako ni būtwakīlage tūdūle kūpījiwa.