Zabuli 8 - Bibilia Ilagano Lya Kale 2015

Ikūjo lya ng'wa SEEBA na kūgūngūhiwa kwa munhū

Kūlwa ntongeeji wa bīmbi; ng'wilaka lya, Gitisi. Zabuli ya ng'wa Daūdi.

¹ Ee SEEBA, ūyo ūlī Seeba wise, ī lina lyako līlī n'ikūjo no hose pyī ū mu sī; Ī likūjo lyako ūlītūūlile kwigūlya ya mapandī g'igūlū.

² Kūfuma mu milomo ya baana na belele, ūhelile jibize ho nguzu ja kūbaheeba a banishi bako, ūng'huumūje būlī ng'wanishi nū maji wa shiilī.

³ Ūlū naagidedeeng'hanya a mapandī g'igūlū lyako, ū nīmo gwa makono gako; ū ng'weji nī sonda, īsho ūshitūūlile ho bebe,

⁴ ū munhū nang'hwe alī shikolo kī, nose ūng'wizūkwe? Ū ng'wana wa munhū alī kī, nose ūnole?

⁵ Ūkang'wīta kūbiza ha sīlīlī ya bamalaika ng'wikanza ido, ūnzwalīka ngikili y'ikūjo na būkumīlījiwa.

⁶ Ūkang'wīta kūbiza higūlya ya milīmo yose ya makono gako; pyī ī shikolo ūshitūūla ha sīlīlī ya mhambala jakwe,

⁷ ng'holo jose na ng'ombe, pyī nī shiinū ja kū matogolo.

⁸ Būyaga na noni ja kūlala, nī ndīlo ja mu nyanza; ī shose īsho shikayeelelaga mu manyanza.

⁹ Ee SEEBA ūyo ūlī Seeba wise, Ī lina lyako līlī n'ikūjo no hose pyī ū mu sī!