Zabuli 77 - Bibilia Ilagano Lya Kale 2015

Kūlūngūjiwa ng'wikanza lya makoye

Kūlwa ntongeeji wa bīmbi; ng'wilaka lya, “Yedusuni.” Zabuli ya ng'wa Asafu.

¹ Nakanīlīīla ū Mulungu n'ilaka lyane, ū Mulungu nakanīlīīla gīkī aniigwe.

² Ū mu lūshikū lwa makoye gane, nakankooba ū Seeba; nakangoloolela makono būjikū pe natanogile, ū būpanga wane walī walema ū kūlūngūjiwa.

³ Ū Mulungu nakang'wizūkwa nūyūgang'hīla, nakang'wideedeng'hanya no, nose ū moyo gwane gūgumīlwa.

⁴ A miso gane ūkūgalemejaga ū kūlilima, naaluhile no, nalīlemeelwa nū kūsomboola.

⁵ Ūlū naajiganika ī shikū ja kale, a makanza ga myaka īyo yabīta kale,

⁶ naalizūkwa nī lyīmbo lyane ū mu būjikū, kūnū ī ng'holò yane īkwidedeng'hanyaga, nalīyibūūja ū mu moyo gwane gīkī,

⁷ “Ū Seeba akūtūponya gete shikū jose? Atūtūchīla shigongo hangī nūūlū hado?

⁸ Ū būtogwa wakwe washilile gete shikū jose? Ū kwisagīja kwakwe kwagelelile gīko dūhū ilalī?

⁹ Ū Mulungu wībile ū kūchīla shigongo? Ī shigongo shakwe washibisile kūlwa būpelanu?”

¹⁰ Hangī nalīyīta niwīla, “Ū mhayo gwa kūminya gete gūlī gīkī, ū nkono gwa būlyo gwakwe ūyo Alī Higūlya no gwagalūkile.”

¹¹ Nakūshizūkwa ī shītīle sha ng'wa SEEBA, alichene, nakūshizūkwa ī shakūkumya shako ī sha kale.

¹² Nakwīyidedeng'hanya pyī ī milīmo yako, nī shītīle shako sha būdūla nakūshiganika.

¹³ Ī nzīla yako, Ee Mulungu, īlī neela. Alīho Mulungu kī ū ntaale gītī Mulungu wise?

¹⁴ Ū bebe ūlī Mulungu ūyo ūkīītaga ya kūkumya; ūyo ūkoolechaga nguzu jako kū banhū.

¹⁵ A banhū bako ūkabakomoola na nkono gwako; a ba shibyalīlwe sha ng'wa Yakobo na Yosefu.

¹⁶ Ee Mulungu, a minzī gakakūbona, a mīnzī gakakūbona gogoha; alichene, ū būjiba būkadetema.

¹⁷ A malunde gakita minzī hasī; Ī ligūlū lyūyūfunya ilaka lya kūpalalūka; a masonga gako gūyūtamagūka kūjisambaalīla pyī ī mhandī.

¹⁸ Ī mihilimo yako yigwiwa mu nyaga gwa nsoke, Ī ndabi jako jūyūlaba heela pye būlī kwene ū mu sī. Ī sī īyūtingina na kūdetema.

¹⁹ Ī nzīla yako yalī ītūngīīlile mu nyanza; Ī nzīla yako yalī ībītīlile mu minzī mashimu, nūūlū īkī ī mhandagū ja būpandījo bo mhambala jako jalī jitamanikile.

²⁰ A banhū bako ūkabatongeela gīt'idaale lya ng'holo, baalī ha sīlīlī ya nkono gwa ng'wa Musa na Alooni.