Zabuli 76 - Bibilia Ilagano Lya Kale 2015

Būpyeni wa būdūla bo ng'wa Mulungu

Kūlwa ntongeeji wa bīmbi; lyīmbo lya kwīmba ndono jikūtūlagwa. Zabuli ya ng'wa Asafu.

¹ Ū mu Yuda ū Mulungu amanīkile, ī lina lyakwe līlitaale ū mu Isilaeli.

² Ī liheema lyakwe līlī mu Salemu, ū wikalo wakwe būlī mu lūgūlū lwa Sayuni.

³ Ū kwenūko akabīnzagūla masonga ga moto, pyī nū lūmūda nī līlūshū, nī shilanga sha būlūgū ī shingī.

⁴ Ūlī na wiza būtaale no, Ī likūjo lyako līl'itaale kūjiheeba nī ngūlū, ūko jikikalaga ndimu ja būlī mbika.

⁵ Bagosha ba mbagashūūla baataajiwe nding'wa, baalambalalile, balī mu tūlo ītī ya kūmisha; bashilikale a hene, alīyo ū mubo atīmo wa kūbūūcha makono gakwe.

⁶ Ee Mulungu o ng'wa Yakobo, falasa jūūmile kwīzī kūlw'ilaka lya kahamīle kako, na a magogoteni gūūsagalala.

⁷ Ū bebe iyene wigeleelilwe kogohwa; ūlū būlinda būbaka ū būpelanu wako, nani adūgije kūkūchaama?

⁸ Ūkahamuka kūfuma ng'wigūlū, ūfunya nsango, ī sī yibakīla yūhuumūlīja zugwi;

⁹ nguno ū bebe, Ee Mulungu, ūkīmīīla kūlamula, kūbapīja pye a bikaji ba mu sī abo bakūluhiagwa.

¹⁰ Na ng'hana ū būpelanu wa banhū būkūkwenhela būkumīlījiwa, a masaajiwa ga būpelanu ūkagitungaga shabiza shilanga shako.

¹¹ Ilahīlagi ū kūlī SEEBA Mulungu wing'we, na munshikīlīgīje; bose pye abo bampīndije bang'wenhele manong'ho, ū wei ūyo igeleelilwe kogohwa.

¹² Hū ng'wene ūyo akakenaagūlaga myoyo ya bataale, ūyo alī wa kogohya kū batemi ba mu sī.