Zabuli 74 - Bibilia Ilagano Lya Kale 2015

Ng'hūngū kūlwa kūkenaagūlwa kwa sī

Lyīmbo lya ng'wa Asafu.

¹ Ee Mulungu, nibūlī watūponije ilalī? Nibūlī ūjipelanīlile na būkalī gīko ī ng'holo ja ng'widīīmīlo lyako?

² Lizūkagwe ī libità lya banhū bako Īlo walīgūla kūfuma kale, a banhū bako abo ūkabakomoola gīkī būbize wingīji wako; lwizūkagwe ū Lūgūlū lwa Sayuni, ūlo lūlī wikalo wako.

³ Līyeleelage ī lipandī īlo līlī mapagale ga būja na būja ī haha; a banishi baakenaagūlile pyī ī shikolo ū ng'wipandī lyeela.

⁴ A banishi bako baayoganije no ū mu numba yako, būleka mo na mbembeela kūlwa shimanīīkījo shabo.

⁵ Baalī gītī banhū na mbasa jabo ng'wipoolu, bakūsengaga masaka.

⁶ Pyī ī shikolo shamo ī sha būlenji baashihīnagūlile bo mbasa, na kūshitobagūla na nundo.

⁷ Ī lipandī lyako lyeela baalītiimile, lyanogotejiwe moto, būbūsosohaja ū wikalo wa lina lyako.

⁸ Baaliwīlaga ū mu ng'holò jabo gīkī, “Tūkūbashigina pye ūmo bagelelile.” Pye a masinagogi ga mu sī yise baagapembile moto.

⁹ Tūtī na shimanīkījo sha kūtoolekeja, na a bahangi batīho ī haha, nīyo ndūhū nūūlū ūmò wise ūyo ayīmanile Ī ng'halīlo y'ikanza.

¹⁰ Ee Mulungu, ū ng'wanishi akwikala ūūkūgīmba nyachilū kūshisha nanalī? Ū ng'wanishi ikale akūlīsondagūlaga Ī lina lyako kūshika nanali?

¹¹ Nibūlī ūkūgūlemejaga ū nkono gwako, ū nkono gwako gwa būlyo? Gwīnjage a ha shikuba aho ūgūbandije.

¹² Alīyo ū bebe, Ee Mulungu ūlī ntemi wane kūfuma kale na kale; mu sī jose hū bebe ūkatūūlaga būpīji.

¹³ Hū bebe ūkīlekanya ī nyanza na nguzu jako, ūbelagūla mitwe ya shiinū mu minzī.

¹⁴ Bebe h'ūyo ūkabelagūla na mitwe ya ng'wa Lewiasani, ūjinha shiinū ja mu matogolo jūlya.

¹⁵ Hū bebe ūkadūlūla nzwīlo ja minzī, ūdūla na mahululu; ūūkamya minzī mu myongo īyo ītoyaga kūhūūma.

¹⁶ Ī likanza lya līīmi līlī lyako, nī lya būjikū nī lyene lyako; hū bebe walībeeja ī līīmi nū ng'weji.

¹⁷ Ī sī ūkītūūlīla bebe pyī ī mbīmbī jayo; ūtūūla ho na makanza ga chū na shidikū.

¹⁸ Ee SEEBA, izūkagwa ūmo bakūkūgīmbīlaga nyachilū a banishi, ūmo bakūlīsondagūlīlaga Ī lina lyako a babbūūlī.

¹⁹ Ū būpanga wa mhunda yako ūtizūbūlekela mashiinū ga mu mapoolu; a banhū bako bakūluhiagwa, ūtizūbīība ilalī.

²⁰ Yaya ū kūlyība ī lilagane lyako; nguno a mapandī ga giiti ū mu sī gookalile ng'hambī ja wiboneeji.

²¹ Ū ng'wiboneelwa ūtizūneka ashoke agookile; ū ng'habī nū ngayiwa balīkumīlīje ī lina lyako.

²² Ee Mulungu, būkaga; Īlwīlīīlage ī ng'hana yako, izūkagwa ūmo bakūkwibengelegejaga a babbūūlī līīmi bbu.

²³ Yaya ū kwīyība ī yombo ya banishi bako, ū nsambo gwa banhū abo bakūkolilwe, ūyo gūkūmanagongeja kūkwīla.