Zabuli 72 - Bibilia Ilagano Lya Kale 2015

Kūnombela ntemi

Zabuli ya ng'wa Solomoni.

¹ Ee Mulungu, ū ntemi nong'hage; nong'hage witegeleja wako ū mu kalamulīle, adime būtūngīlīja wako ū ng'wana wa ntemi.

² Ayūbalamula mu būtūngīlīja a banhū bako; a banhū bako a bagayiwa mu wīma.

³ Ī ngūlū jibinhe būsabi a banhū, wigele būtūngīlīja ū mu matūmbī.

⁴ Ū ntemi akūbaguna a biboneelwa ū mu banhū, a baana ba bagayiwa akūbapīja, ū ng'wiboneeji akūntobagūla.

⁵ Banhū ba shibyalīlwe shose bakūng'ogoha shikū jose, aho līīmi na ng'weji shitaalī shisugile.

⁶ Akūbiza gītī mbula īkwikaga chiza chiza ha maswa madoto, gītī iswalala īlo līkadotyaga sī.

⁷ Ū mu shikū jakwe bakūfuluma a batūngīlīja; Īkūbiza ho mhola ningī, shikū jose ilalī.

⁸ Ū ntemi akūsuga kwīngīīla kū nyanza īmò kūshika kū nyanza yīngī, kūfuma kū Līmongo kūshisha kū ngelelo ya sī.

⁹ A bikaji ba mu sī ja nhogolo bakūtuja mazwi kū būtongi bokwe; a banishi bakwe bakwinama kūshisha balambe lūbuubu hasī.

¹⁰ Batemi ba Talishishi na ba kū majinga bakūng'wenhela goodi, batemi ba Sheba na Seba bakūfunya manong'ho.

¹¹ Pye a batemi bakūntugīja mazwi, na a mahanga a gose gakūntūmamīla we.

¹² Nguno akampījaga ū ngayiwa ūlū ūnīlīīla, ū ng'habī nū yūyo atī na wa kūngunanha.

¹³ Akabachīlaga shigongo a bagayiwa abo batī na shiigunanhīlo; hū ng'wene ū mpīja wa būpanga wa bagayiwa.

¹⁴ Akūwīnja ū būpanga wabo mu wiboneelwa na kwītīlwa nsambo; nguno a mininga gabo galī na mpango ntaale ū kūlī we.

¹⁵ Ū ntemi ni alamage shikū ningī, hama inhwe zahabu ja kūfuma Sheba; a banhū bayūnombela būlī gwa, nīyo bamfuuhe būlī lūshikū.

¹⁶ Banhū bapandīke mhona hose pyī ū mu sī, shilīwa shingī shiponeke pye a hose ū mu sī. Shifulume ū mu migūnda, shitwaje matwajo gītī ga mitī ya Lebanoni; hama shiponeke gītī maswa mu madīīmīlo.

¹⁷ Ī lina lya ntemi līshinge ho būja na būja, ū lūkumo lwakwe lwikale ho shikū jose ilalī. Ū mulī we mahanga gose gīlūkīlwe mbango, na bahabūle hape gīkī alī na mbango.

¹⁸ Akumīlījiwe ū SEEBA, ū Mulungu wa Isilaeli, ūyo we wike akabeejaga mihayo ya kūkumya.

¹⁹ Ī lina lyakwe līkumīlījiwe welelo bose; sī jose jookale ikūjo lyakwe. Ee, Alichene.

²⁰ Ū kūlomba kwa ng'wa Daūdi ng'wintūja wa Yese, kwakalīkīla henaha.