Zabuli 7 - Bibilia Ilagano Lya Kale 2015

Kūlomba kwa ng'wiboneelwa

Lyīmbo lya ng'wa Daūdi, īlo akang'wīmbīla SEEBA alīng'haya Kushi wa lūganda lwa Benjamini.

¹ Ee SEEBA Mulungu wane, nalīpeelela kūlī bebe napīle, nigunage ūnīnje ū mu makono ga bose abo bakūnikoobaga,

² batizūnisasana gītī mashimba, banitandalūūnhe ndūhū na wa kūniguna.

³ Ee SEEBA Mulungu wane, ū nene ūlū naagwīta ū gwenūyū, a makono gane ūlū gabize galī mu kwihīga,

⁴ ūlū nang'wītīla yabūbi munhū ūyo alī mhola kūlī nene, nūūlū ng'wanishi wane nantaagīja shikolo bo kūng'wiboneela;

⁵ ūlū īlī gīko ū ng'wanishi ūyo akūnikoobaga ni anipandīkage, nū būpanga bone ni abūpandagīlage hasī; anishigine nabize lūbuubu.

⁶ Ee SEEBA, būkaga ūbooleche ū būpelanu wako, Īmīīlaga ūbūhangīje ū būsaayi wa banishi bane, Mulungu wane, mishaga ūtūūle ho būtūngīlīja.

⁷ Ibità lya banhū ni libilingage līkūpīndije, igashaga ūbasuge na būdūla bo kūfuma kwigūlya.

⁸ Ū SEEBA hū ng'wene ū Namuji wa banhū, Ee SEEBA, nilamulage kūlenganīla na būtūngīlīja bone, kūlenganīla na būgololoku bo nhūngwa jane.

⁹ Ee Mulungu ntūngīlīja, bebe ūyo ūkagīsīlījaga maganiko na ng'holò, būmalage ū būkenaagūji wa bahūnga, a batūngīlīja ūbaguzuhye badūle kwīmīīla.

¹⁰ Ū Mulungu ūyo Alī Higūlya no hū ng'wene alī lūmūda lwane, h'ūyo akabapījaga a ba ng'holò jigoloolile.

¹¹ Ū Mulungu ng'wene Namuji ntūngīlīja, alī Mulungu ūyo būpelanu bokwe aboolekije pyī ī shikū.

¹² Ūlū munhū atatogilwe kūgalūka, ū Mulungu akalūnoolaga ū lūshū lwakwe, nū būta bokwe akabūbangaga wabūduta widadīla.

¹³ Agolanije shilanga sha kūbūlagīla, a masonga gakwe ūgīīta kūbiza ga moto.

¹⁴ Ū wabūbi akatūngaga nda ya malofu, wabūūcha nigo gwa nda ya makoye, hūna wabyala būlomolomo.

¹⁵ Akasīmbaga ichongo walīfukūūla lyashima, wei ng'wenekīlī wiza kūgwīla ū ng'wichongo īlo walīsīmbaga.

¹⁶ A makoye ayo akagenhelejaga gakanshokelaga wei, ū wiboneeji bokwe būkangwīlaga ha ntwe gwakwe ng'wenekīlī.

¹⁷ Nakūnūmba ū SEEBA kūlwa būtūngīlīja wakwe, Ū na nakwīmba kūlwa kūlīgongoola ī lina lya ng'wa SEEBA ūyo Alī Higūlya no.