Zabuli 68 - Bibilia Ilagano Lya Kale 2015

Lyīmbo lya būtindi

Kūlwa ntongeeji wa bīmbi. Lyīmbo lya ng'wa Daūdi mu Zabuli.

¹ Ū Mulungu leka abūūke, a banishi bakwe babbalasane; abo bankolilwe bīnge ū kū būtongi wakwe bakūpeelaga.

² Ūmo lyochi līkasambaagījiagwa lūyaga, nabo a benabo basambaajage gīko; a ba malofu ni baabage ū kū būtongi o ng'wa Mulungu, gīt'ūmo būgondo būkaabīlaga ūlū wegeelwa moto.

³ Alīyo a batūngīlīja leka bayege, bazalabane ū kū būtongi bo ng'wa Mulungu, ni basangabalage bayege no no no.

⁴ Ng'wīmbīlagi ū Mulungu, līgongoolagi ī lina lyakwe, nkumīlījagi no no no, ū wei ūyo akashimīzaga igashije ha malunde. Ī lina lyakwe alī SEEBA, sangabalagi kū būtongi wakwe.

⁵ Ū wei ise wa babo batī na basaabo, na neji wa bachīlwa, Mulungu ūyo alī mu wikalo wakwe wela.

⁶ Abo balī ng'wilundu, ū Mulungu akabinhaga kaya ja kwikala, a batungwa akabatungūlaga babiza mu wiyaabī; a bashitiigwa bakikalaga mu sī ng'halamuku.

⁷ Ee Mulungu, aho wabatongeelaga a banhū bako, aho wababītyaga mu sī ya matogolo makalamuku,

⁸ Ī sī īkatingina; Ī ligūlū liita mbula hasī kū būtongi o ng'wa Mulungu, ūyo Alī wa Sinai, kū būtongi bokwe ū Mulungu, ū Mulungu wa Isilaeli.

⁹ Ee Mulungu, ūkatūma mbula ya kwigela, ūkabashokeja nguzu a banhū ba būbyīle wako abo baalī basedeeka.

¹⁰ A banhū bako bakapandīka mo wikalo, na kūlwa wiza wako, Ee Mulungu, ūkabinha sha kūbīnja ū mu makoye gabo.

¹¹ Ū Seeba akafunya shilagīlo, ibità itaale lyūshikumūcha.

¹² Batemi na mabità bakūpeelaga, bakīma h'a bagabanhyaga nding'wa mu kaya.

¹³ Nūūlū ūkadīīla hamò na madaale ga ng'holo, alīyo nahene ūbange gītī ng'hūūlū, īyo manana gayo ganaagīlilwe feza, nī nzooya jūnaagīlwa zahabu ng'weku.

¹⁴ Ū Ndūji wa shose aho wabasalang'hanya a batemi ū kwenūko, ī Zalimoni īkabiza gītī yidīkīlagwa seluji.

¹⁵ Ū lūgūlū lwa Bashani lūlī lūgūlū lwa magaka; ū lūgūlū lwa Bashani lūlī na mawe mingī gasongokile ū kwigūlya.

¹⁶ Bing'we ngūlū ja mawe gasongokile, nibūlī mukūlūlolaga mu wilu ū lūgūlū ūlo Mulungu alūsolile iikale mo, ū lūgūlū ūlo SEEBA akwikala mo welelo bose?

¹⁷ A magogoteni ga ng'wa Mulungu galī mingī no, galī makūmi ga mashihūmbī; ū Seeba alī ng'wipandī lyakwe lyeela, wizile kūfuma Sinai.

¹⁸ Ū bebe aho walinha kwigūlya ūkadima nding'wa, wanukūla manong'ho kūfuma kū banhū, pye na a bashitiigwa, gīkī ū SEEBA Mulungu ikale mubo.

¹⁹ Akumīlījiwe ū Seeba, ū Mulungu mpīja wise, ūyo hangī alī ndīlīji wise wa būlī lūshikū.

²⁰ Ū Mulungu wise alī Mulungu wa būpīji, nīyo ū kūlī Mulungu h'ūko īlī nzīla ya kūpīla icha.

²¹ Alīyo ū Mulungu akwībelagūla ī mitwe ya banishi bakwe, ī mitwe ya mishinji, Ī ya banhū abo badaamīīlile mu shibi shabo.

²² Ū Seeba alīhaya gīkī, “Nakūmushosha kūfuma ī Bashani, nakūmushosha kūfuma ū kū būjiba wa nyanza;

²³ Ī mhambala jing'we jikūpanda mu mininga ga banishi bing'we, nī ndīmi ja mvwa jing'we jipandīke sha kūzabangīla.”

²⁴ Ee Mulungu, mabità gako bagabonile, mabità ga ng'wa Mulungu wane ū Ntemi, bagabonile gakūshimīzaga kūja ng'wipandī lyeela.

²⁵ Ū kū būtongi balīko bīmbi, bakūlondeelagwa na batūji ba ndono, hamò na banhya bakūtūlaga tūng'oma.

²⁶ Nkumīlījagi Mulungu libilinga itaale, abo mufumile mulī Isilaeli, nkumīlījagi ū SEEBA.

²⁷ Benjamini ū ndo mu bose, h'ūyo atongelile; galīho na mabità ga bataale ba mu Yuda, na bataale ba mu Zabuloni na ba Nafutali.

²⁸ Ee Mulungu, lagījaga mu būdūla wako, toolekejage ī nguzu jako, Ee Mulungu, gīt'ūmo ūkīītīla ha kwandya.

²⁹ Kūlwa nguno ya hekalu yako Īyo īlī mu Yelusalimu, batemi bakūkwenhela manong'ho.

³⁰ Jihamage ī shiinū ja mu madete, Ī lidaale lya mayagamba ayo galī mu ndama ja banhū; bapandagīlage bashile ng'hani, kūshisha benhe feza kūlwa shakwinha. Babbalasanyage a banhū abo bayegelile būlūgū.

³¹ Batūmījiwa bakwiza kūfuma Misili, nī Esiopia īkwidohya ū kūlī Mulungu.

³² Bing'we mabūtemi ga mu sī, ng'wīmbīlagi ū Mulungu, īmbagi mungongoole ū Seeba,

³³ ūyo akigashaga higūlya ya malunde, a gaho na kale; ūyo akapalalūkaga n'ilaka itaale.

³⁴ Būkumūchagi ū būdūla bo ng'wa Mulungu, ūyo būtaale bokwe būzunyiwe ū mu Isilaeli; ū būdūla bokwe būlī ng'wigūlū.

³⁵ Ee Mulungu, ūlī wa magaka ū ng'wipandī lyako lyeela; ū Mulungu wa Isilaeli hū ng'wene akabinhaga būdūla na nguzu banhū bakwe. Akumīlījiwe ū Mulungu wise.