Zabuli 66 - Bibilia Ilagano Lya Kale 2015

Kūnkumīlīja Mulungu

Kūlwa ntongeeji wa bīmbi. Lyīmbo mu Zabuli.

¹ Tūlagi mhūndū, munyegele ū Mulungu, bing'we bose a bikaji ba mu sī!

² Īmbagi kūlw'ikūjo lya lina lyakwe, ng'winhagi ikūjo na mungongoole.

³ Ū Mulungu ng'wīlagi gīkī, “Ī shītīle shako shilī sha kūgekemaja! Nū būdūla wako būlī būtaale no, nose a banishi bako balīyūgwa bakūdetemaga ū kū būtongi wako.

⁴ Pye a ba mu sī bakūkūlamyaga, bakwīmbaga mīmbo ga kūkūgongoola, bakwīmbaga kūlīgongoola ī lina lyako.”

⁵ Nzūgi ng'wīlole īyo wīyītile ū Mulungu, akīītaga ya kogohya ū mu banhū.

⁶ Akagalūcha nyanza yūbiza sī nyūmu; na mongo, būgūkīla bakūshimīzaga bo magūlū. A henaho tūkanyegela no.

⁷ Hū wei ū nsugi wa būja na būja kūlwa būdūla wakwe, pye a mahanga agalolile na miso gakwe; abo bangomelile ni batizag'igūngūhya ū kūlī we.

⁸ Bing'we banhū, nkumīlījagi ū Mulungu wise, hamukagi higūlya liigwiwe ī lilaka lya kūnkumīlīja,

⁹ ū wei ūyo alī nang'hani wa būpanga wise, na a magūlū gise atagalekanījaga gachūūlūlūke.

¹⁰ Nguno ū bebe, Ee Mulungu, watūlolile; ūkatūgema ūmo feza jikagemelagwa.

¹¹ Ūkatūdutīīla mu ntego ūtūgwasha, hūna ūtūseseja miligo midito.

¹² Ūbaleka banhū batūpandagīle kū mitwe; tūūbīta mu moto na mu minzī. Alīyo nose watwenhile ng'wipandī lya shikolo shingī.

¹³ Nakwiza na shitambò sha kūpemvwa ū kū numba yako, nakwīshikīlīja īyo nakwilahīlīla;

¹⁴ Īyo nakīhaya na nomo gwane, nene ng'wenekīlī nakakwilahīlīla aho naalī mu makoye.

¹⁵ Nakūkūfunīja shitambò sha kūpemvwa, kwīngīīla mu shawiza īsho nalī nasho; na ng'ondi ja shitambò sha ng'waso gwawiza. Nakūfunya na nzagamba ja shitambò hamò na mbūli.

¹⁶ Bing'we bose abo mung'ogohile Mulungu, nzūgi mudegeleke namuwīle īyo wanīītīlile.

¹⁷ Nakanīlīīla n'ilaka lyane, nū lūlīmi lwane lūnkumīlīja.

¹⁸ Ūlū ni naalī nabisile shibi ū mu ng'holò yane, ū Seeba ni atanidegelekile.

¹⁹ Alīyo ū gwa ng'hana gūlī gīkī, ū Mulungu akanidegeleka, ūliigwa ī lilaka lya kūlomba kwane.

²⁰ Alūmve ū Mulungu, ūyo atakūlemile ū kūlomba kwane, nūūlū atanīngīgije ū būtogwa wakwe.