Zabuli 65 - Bibilia Ilagano Lya Kale 2015

Mulungu nang'hani wa shose

Kūlwa ntongeeji wa bīmbi. Zabuli ya lyīmbo lya ng'wa Daūdi.

¹ Ee Mulungu, wigeleelilwe kūkumīlījiwa ū mu Sayuni; nīyo īyo tūkūkūlahīlīlaga tūkūkūshikīlīgīja.

² Ee bebe ūyo ūkigwaga kūlomba, a banhū pye a bose bakwiza kūlī bebe.

³ Aho shalī shitūheebile ī shibi, ū bebe ūkatūlekeja ū būkenaagūji wise.

⁴ Alī na lubango ūyo ūkūnsola ūng'wegeleje kwikala mu gwalugwa jako. Tūkwigūtiagwa shizeeze sha mu numba yako, Ī hekalu yako neela.

⁵ Ee Mulungu Mpīja wise, ūkatwigwaga watūshokeja mu koolecha shītīle shako sha magaka mu būtūngīlīja; bebe ūyo ūlī kwisagīlwa hose pye, kūshisha kū ngelelo ya sī na manyanza.

⁶ Aho wajizwalīla ī nguzu jako, ūkajibeeja ī ngūlū mu būdūla wako.

⁷ Hū bebe ūkīhuumūjaga ī nyanza ūlū yasalingūkaga, nū būlibangūki wa mahuli gayo; pyī nū kwiyugūūla kwa mahanga.

⁸ Nose na a bikaji ba kūle bashogohile Ī shimanīkījo shako; ūkenhelejaga gabize ho mīmbo ga būyegi kwandīja dilū līīmi līlīfuma, kūshisha mhīndī līlīsalalīja.

⁹ Ī sī ūkīgenihaga wīng'wisha minzī, hama ūkīyītaga ībize na shikolo shingī; ū mongo go ng'wa Mulungu gokalile minzī pa, kūlwa kūbapandīkīla shilīwa; nguno h'ūmo ūhelelile.

¹⁰ Ī migūnda ūkīyisīīlaga minzī ga mbula, gaasambaala a mandī; hūna yaloba ī sī, yanoga yigela kalīmīlwe, Īsho shikazwaga shanukūla mbango.

¹¹ Ū ng'waka ūkagūnong'haga mbooto yako, a mabīkīlo ga shilīwa gaayūgekema dūhū.

¹² A matogolo ū kū madīīmīlo gakifafatīīlaga, na a matūmbī nago gakazwaalīlaga būyegi.

¹³ A magoobe gakokalaga madaale ga ng'holo, hama a malago gaatang'anhīla shilīng'wa; gaayikala galīyoganya na kwīmba kūlwa būyegi.