Zabuli 62 - Bibilia Ilagano Lya Kale 2015

Kūnsanya SEEBA mu būlembeezu

Kūlwa ntongeeji wa bīmbi. Zabuli ya ng'wa Daūdi, Ng'wilaka lya, Yedusuni.

¹ Ū būpanga wane būkwifuulīlaga mulī Mulungu iyene; ū būpīji wane būfumile kūlī we.

² Wei wike h'ūyo alī shiganga shane na būpīji wane, alī būpīlīlo wane, natīko kūtinginyiwa.

³ Mukwikala mukūng'ūbūkīlaga ū munhū kūshisha nanalī? Pye a bing'we benaba muntinganīlile ū munhū ng'wenūyū gīkī mūngwishe, alīyo atikīlile na ndugu īdaalamile kūgwa, nūūlū lūgūtū lūsambaagūkile?

⁴ Balomanile gwa kūntyūla a h'ikūjo lyakwe, bayegelile mihayo ya būlomolomo, a ha nomo bakayombaga mihayo ya mbango, alīyo ū mu gatī bakazumaga.

⁵ Ee būpanga wane, nindīīlage Mulungu wike, ū kwisagīlwa kwane kūfumile kūlī wei.

⁶ Wei wike h'ūyo alī shiganga shane na būpīji wane, alī būpīlīlo wane, natīko kūtinginyiwa.

⁷ Ū būpīji wane nī likūjo lyane shinsendamīlile Mulungu; ū wei alī shiganga shane sha nguzu, n'ibūngīlò lyane.

⁸ Bing'we banhū, nsanyagi we makanza gose, Ī ng'holò jing'we ntūūlīlagi we, nguno ū Mulungu alī ibūngīlò lise.

⁹ A banhū a bose balī myūyī gwike, nīyo batikīlile na kūdūhū pye na a bakūjiwa. Ūlū būtūūlwa h'ipimīlo babbūūpu no, nūūlū bakakūbanījiwa pye pye pye gete, nahene babbūūpu leba nī myūyī.

¹⁰ Lekaga kūsanya nhūngwa ja wiboneeji, nūūlū ūtizikumīlīja kūlwa sabo ya kwiba. Ī sabo yako nūūlū īkakwīla, yaya ū kwīlogeja henaho ī ng'holò yako.

¹¹ Ū Mulungu walūngalūnga kamò, nashishaga kabīlī nalīgwigwa ū gwenūyū; gīkī, Ū būdūla būlī bo ng'wa Mulungu,

¹² na gīkī, Ū bebe, Ee Seeba, ūlī na būtogwa būtaale. Na ng'hana ūkūnīpa būlī munhū kūlenganīla na nhūmamīle yakwe.