Zabuli 60 - Bibilia Ilagano Lya Kale 2015

Ihanga kūlomba kūgunanhwa

Kūlwa ntongeeji wa bīmbi. Lyīmbo lya ng'wa Daūdi, lya kūlanga; ng'wilaka lya, Būlabo bo Ng'wilagane. Yalī ng'wikanza aho akalwa na bana Alamu-nahalaimu na Alamu-zoba; ikanza lyenīlo Yoabu washokaga kūfuma kū būlūgū, ūbabūlaga Baedomi shihūmbī ikūmi na shibīlī mu mbūga ya munhu.

¹ Ee Mulungu, watūlekanīgije, hūna ūlola ūtwitīīla būpelanu wako, wapelanile no; ni watūshosha lūūlū.

² Wītinginije ī sī yūtandaligūka, Īshoshage būpya īdimane, īshoke hangī ūmo yalī na kale, nguno īlīgekema no.

³ Hū bebe wabingīgije a banhū bako mu makoye mataale, bebe ng'wenekīlī watūng'wishije shikoji, shikūtūlelengetyaga.

⁴ Alīyo abo balī na logohano kūlī bebe, wabanungīgije lūbembeela, ūlo lūtīko kwichiwa makanza ga būlūgū.

⁵ Tūpījage, na tūgunanhage na nkono gwako gwa būlyo, batizūyagaala a batogwa bako.

⁶ Ū Mulungu akayomba kūfuma ng'wipandī lyakwe lyeela, “Ī Shekemu nakwīgabanhya nayegile; nī mbūga ya Sukoti nakwīmeganhya.

⁷ Ī Gileadi yane, nī Manase nayo yane, Efulaimu yene ngikili ya kū ntwe gwane; ī Yuda gūlī nang'ha gwane gwa būsugi.

⁸ Ī Moabu ibbakuli lyane lya kūkalabīla, Ī Edomu nakwīponekeja shilatū shane; ī Filisti yene nakwītūlīla kaluulu kūlwa būtindi.”

⁹ Nani akūnishisha ū kū nzengo ūyo gūzengeelilwe ndugu? Nani akūnitongeela ū kūja ī Edomu?

¹⁰ Ūtī bebe Ee Mulungu, ūyo watūlekanīgije, na a mabità gise oyile ū kūfuma nago?

¹¹ Twinhage būdūla wa kūbapyena a banishi; nguno ū būgunanhi wa munhū būtī na ngofyoolo.

¹² Alīyo ūlū tūlī hamò na Mulungu, tūlī bapyeni; hū ng'wene akūbapandagīla a banishi bise.