Zabuli 51 - Bibilia Ilagano Lya Kale 2015

Kūlomba kūlekejiwa būkenaagūji

Kūlwa ntongeeji wa bīmbi. Zabuli ya ng'wa Daūdi aho akahūgūlwa na ng'hangi Nasani kūlwa kūshihya na Betisheba.

¹ Ee Mulungu, nichīlage shigongo, kūlenganīla na būtogwa wako ūbo būtashilaga; ūmo būlī wingī wa shigongo shako, būjimangūchage ū būkenaagūji wane.

² Nojage neele gete ū būbi wane, ūneeje kūfuma ū mu shibi shane.

³ Nguno nabūmanīle ū būkenaagūji wane, Ī shibi shane shilī kū būtongi wane gwa.

⁴ Naakwītīlile shibi bebe, bebe ng'wenekīlī, nīītile ya malofu no ū kū būtongi wako, ū bebe wiyooleche ūlī ntūngīlīja ū mu kahayīle kaako, nū mu kalamulīle kaako ūbize ntindi.

⁵ Ūmanile gīkī ū nene naabyalīlwa mu shibi, nalī wa shibi kūfuma ikanza lya kūtūngīlwa nda na mayū.

⁶ Ū bebe ūkayejiagwa na ng'hana ya kūfuma mu gatī ya ng'holò, ū mu gatī yane ūkanilangaga masala.

⁷ Neejage na hisopo, nakwela; nojage, nakwela pe kūtinda seluji.

⁸ Nīītage niyigwe kūyega na kūsangabala, na a maguha ayo wagapondagūlile gazalabane.

⁹ Būbisage ū būshū wako ū kū shibi shane, ūbūjimangūche pye ū būhūbi wane.

¹⁰ Ee Mulungu, nibūmbīlage ng'holò neela ū mu gatī yane, nū moyo ūyo gūlī mulī nene ūgūbeeje gūbize mpya na ntūngīlīja.

¹¹ Yaya ū kūniponya nīnge ū kū būtongi wako, nūūlū ūtizūnīngīja ū Moyo Ng'wela wako.

¹² Nishokejage ū būyegi wa mu būpīji wako, ūnilang'hane mu kūninha moyo gwa wigwi.

¹³ Hūna a bahūbi nakūbalanga ī nzīla jako, na a ba shibi bakūkūshokela bebe.

¹⁴ Ee Mulungu, Mulungu wa būpīji wane, nipījage ū mu shibi sha būbūlagi; hūna ū lūlīmi lwane lūkūhīlīīla kwīmba ya būtūngīlīja wako.

¹⁵ Ee Seeba, ninhage būdūla wa kūlūngalūnga, ū nomo gwane gūkūlīkumīlīja ī lina lyako.

¹⁶ Ū bebe ūtī na ng'hūmbū na shitambò, numho ni nashifunya; ūtayejiagwa shitambò sha kūpemvwa.

¹⁷ Ī shitambò īsho shiigelile kūmfunīja Mulungu shilī moyo nogu; ī ng'holò nogu na ya kūpīnīhala kūlwa būbi, ūtīko kwīdalaha, Ee Mulungu.

¹⁸ Ū mu wiza wako, yītīlage misoga ī Sayuni, jizengage hangī ī ndugu ja Yelusalemu.

¹⁹ Hūna shikūfunyiwa shitambò mu būtūngīlīja kūlwa kūkūyeja, shitambò sha kūpemvwa shigima, na nzagamba jikūfūnyiwa a ha ng'walīlo gwako.