Zabuli 50 - Bibilia Ilagano Lya Kale 2015

Mulungu Namuji wa bose

Zabuli ya ng'wa Asafu.

¹ Ūyo alī wa būdūla, ū SEEBA Mulungu, alīyomba, na alījikomiga ī sī jose pye, kwīngīīla kū būfuma līīmi, kūshisha kū būgwīlo walyo.

² Ū Mulungu akūng'weka ng'wekaga kūfuma Sayuni, lūgūlū lūsoga mu kabeelele kose.

³ Ū Mulungu wise aliza, na atikala ahumūlile sele; ū kū būtongi bokwe gūlīko moto gūkūligimaga, kose kose apīndiwe kashūlūdu nhaale.

⁴ Alīgahamukīla a mapandī g'igūlū ū kwigūlya, hamò nī sī; gīkī abalamule a banhū bakwe.

⁵ “Beela bane, ibilingīlagi kūlī nene kūnū, a bing'we abo ng'wabeeja ilagane na nene mu nzīla ya shitambò.”

⁶ A mapandī g'igūlū nago galībūkumūcha ū būtūngīlīja wakwe, nguno ū Mulungu hū ng'wene ū Namuji.

⁷ “Bing'we banhū bane, nidegelekagi nayombe, Ee Isilaeli, nakūkūkaanīlīja; ū nene nalī Mulungu, Mulungu wako.

⁸ Natūkūhamaga kūlwa shitambò shako, nūūlū kūlwa shitambò shako sha kūpemvwa, īsho shilī kū būtongi wane būlī gwa.

⁹ Natī na nguno ya kūsola nzagamba kūfuma mu ngūtū jako, nūūlū ngulyati kwīnga mu mbīgīlī jako.

¹⁰ Nguno pyī ī ndimu ja mu mapoolu jilī jane, na kū ngūlū shihūmbī nū kwene ndimu jike.

¹¹ Ī noni jose ja mu ngūlū najideebile, nī ndimu pyī ī ja mu matogolo jilī jane.

¹² Ūlū ni mhayo gwa kūtuuba, ni natakūmanije, nguno ī sī īlī yane, nī shose īsho shilī muyo.

¹³ Ūnene nakalyaga nyama ja nzagamba, nūūlū nakang'waga mininga ga mbūli?

¹⁴ Ū Mulungu mfunījage shitambò sha kūlūmba, nshikīlīgījage ī shilahīlo shako ūyo Alī Higūlya no.

¹⁵ Nitanage ū mu lūshikū lwa makoye, nakūkūpīja, nang'ho ūkūnikūja.”

¹⁶ Alīyo ū kūlī munhū wabūbi, ū Mulungu alīhaya gīkī, “Ūlī na kī nang'ho ū bebe nose wikale ūkūshihayaga ī shilagīlo shane, nūūlū kwikala ūlīhooyela ī lilagane lyane?

¹⁷ Nguno ū bebe ūlemile ū kūhūgūlwa, nī mihayo yane ūlemile ū kwīdīlīla.

¹⁸ Ūlū wamona ng'wibi ūkadimanaga nang'hwe, a bashihani na a bene ūsangije lūdīīma nabo.

¹⁹ Nū nomo gwako ūzunije gwīte ī ya malofu, nū lūlīmi lwako lūkikalaga lūdosa būmaama.

²⁰ Ūkikalaga mu mahooya ga kūnsīīga ndūgūyo, ng'wanong'wing'we gete ūkanembekejaga mihayo.

²¹ Ī yenīyī ūkwīyītaga nahumūlile dūhū, nose ūkwiganikaga nū nene nalī gīt'ūmo ūlī bebe. Alīyo managa gīkī, ī haha nakūkūhama, ū nsango gwako nakūgūfunīja ha ng'wape ūgūbone na miso gako.

²² Alilūūlū, a bing'we abo mung'wībile ū Mulungu gwitegelejagi ū mhayo gwenūyū, ūlū ītī chene nakūmutandagūla, na atīho wa kūmuguna.

²³ Ū wa kūfunya shitambò sha būlūmbi, anikūgije ū ng'wenūyo; nū yūyo ilang'hanile ū mu kashimīzīle kakwe, nakūng'oolekeja ū būpīji bo ng'wa Mulungu.”