Zabuli 48 - Bibilia Ilagano Lya Kale 2015

Lyīmbo lya Sayuni

Lyīmbo, Zabuli ya bitūnja ba ng'wa Koola.

¹ Ū SEEBA ng'wene alī ntaale, na iigeleelilwe kūkumīlījiwa nīyo no, ū mu nzengo go ng'wa Mulungu wise, kū lūgūlū lwakwe lwela.

² Lūgūlū lūlīhu na lwawiza kūlola, lūgūlū lwa Sayuni, ūlo lūlī mbūūkī ya būyegi kū sī jose, kūle, ipandī lya sukuma; kū kaya ya Ntemi Ntaale.

³ Ū mu ng'hambī ja balang'hani baamo, ū Mulungu wiyoolekije hape, gīkī alī ibūngīlò lya kūsanyiwa.

⁴ Nguno batemi bakikobya hamò, bose pyī būsanja mabità kwiza kūūbūka.

⁵ Bahayūbona bibakīla, būbbaha, būsha nhambo.

⁶ Bakagwīlwa idedebaji būyūdetema, būding'wa būsūngū gītī nkīma ng'wikanza lya kūbyala.

⁷ Ūbabīnzagūla kībi kībi, gītī meli ja Talishishi kūpaanagūlwa nyaga gwa kīya.

⁸ Ūmo tūkigwīla, h'ūmo tūbonelile ū mu nzengo go ng'wa SEEBA wa būdūla bose, ū nzengo go ng'wa Mulungu wise; Mulungu ng'wenekīlī hū nang'hani wago, gīkī gūbize na nguzu shikū ja welelo bose.

⁹ Ee Mulungu, ū mu hekalu yako tūkūwideedeng'hanyaga ū būtogwa wako, ūbo būtashilaga.

¹⁰ Ūmo līlī ī lina lyako, Ee Mulungu, h'ūmo lūsambaalīlile nū lūkumo lwako, hose pyī kūshisha kū ngelelo ya sī jose; ū nkono gwako gwa būlyo gokalile būtūngīlīja.

¹¹ Ū lūgūlū lwa Sayuni ni lūyegage, a bashīke ba mu Yuda ni bayegage kūlwa nguno ya kalamulīle kako.

¹² Yeela yeelagi ū mu Sayuni, muje mukūpīndīīlaga hose hose, nī ng'hambī ja balang'hani ījo jilīmo mujibale.

¹³ Jideedeng'hanyagi ī ndugu ījo jipīndīlīgije, mugalole na a manumba ga balang'hani baamo; mupandīke ya kūsomboolela na shibyalīlwe Īsho shiliza.

¹⁴ Nguno ū Mulungu ng'wenūyū, alī Mulungu wise shikū jose welelo na weleo. Hū ng'wene akūtūtongeela kūshisha kū ngelelo ya yose.