Zabuli 46 - Bibilia Ilagano Lya Kale 2015

Ū Mulungu al'ibūngīlò lise

Kūlwa ntongeeji wa bīmbi. Zabuli ya bitūnja ba ng'wa Koola, ng'wilaka lya Alamosi.

¹ Ū Mulungu al'ibūngīlò lise na nguzu, ngunanhi mu makoye ikanza lyose lyose.

² Nose tūtogoha nūūlū ītingine ī sī, nūūlū ī ngūlū jikagwīle mu būjiba bo nyanza,

³ Nūūlū a minzī ga nyanza galundume, kūnū gakūboogaga ifulo, nī ngūlū jiyūtandūka kūlwa kūyugūūka kwenūko,

⁴ Gūlīho mongo, ūyo matambī gago gakagūyejaga ū nzengo go ng'wa Mulungu, h'ī lipandī lyeela, ūmo akikalaga ūyo Alī Higūlya no no no.

⁵ Ū Mulungu alī hamò nū nzengo gwenūyo, nose gūtīko kūgwishiwa; ū Mulungu akūgūgunanha, nīyo dilū no.

⁶ A mahanga gapelanile, na mabūtemi gakūgwishiagwa; ū wei akafunyaga ilaka yaaba ī sī.

⁷ Ū SEEBA wa būdūla bose alī hamò nise, ū Mulungu o ng'wa Yakobo alī liibisīlo lise.

⁸ Nzūgi mushilole ī shītīle sha ng'wa SEEBA, ūmo wīkenaagūlīlile ī sī!

⁹ Akahuumūjaga būlūgu hose pye kūshisha kū ngelelo ya sī; ū būta akabūbīnzagūlaga na a machimu wagabutagūla, na magogoteni akagapembaga moto.

¹⁰ “Lembeelagi hūna mukwitegeleja gīkī ū nene nalī Mulungu, nakūgūngūhiwa ū mu mahanga, nakūgūngūhiwa ū mu sī.”

¹¹ Ū SEEBA wa būdūla bose alī hamò nise, ū Mulungu o ng'wa Yakobo alī liibisīlo lise.