Zabuli 44 - Bibilia Ilagano Lya Kale 2015

Kūlomba kwa nuhi

Kūlwa ntongeeji wa bīmbi. Lyīmbo lya bitūnja ba ng'wa Koola.

¹ Ee Mulungu, twigwa bise benekīlī na matū gise, a bakūlūgenji bise batūwīla ī milīmo īyo wībeejaga mu shikū jabo, ī ja kale.

² Bebe ūkapeeja mahanga na nkono gwako, ūbahamba a bakūlūgenji bise; ūkagakenaagūla a mahanga genayo, alīyo a boyi ūbagalīhīja būūtana.

³ Ī sī batīdimile kūlwa shilanga shabo; nūūlū nkono gwabo gūtabinhile būtindi. Gwalī nkono gwako gwa būlyo, nkono gwako bebe ng'wenekīlī, n'isana lya būshū wako, īkī walī ūbayegelile.

⁴ Ū bebe ūlī Ntemi wane na Mulungu wane, hū bebe ūkalagīlaga ū Yakobo abize ntindi.

⁵ A banishi bise tūkabaheebaga mu nguzu jako, mu lina lyako tūkabapandagīlaga a bilwisha bise.

⁶ Nguno ū nene natīko kūsanya būta wane, nūūlū ū lūshū lwane lūtūnenhela būpīji.

⁷ Alīyo ū bebe hū ūkatwinhaga būdūla wa kūbapyena a banishi bise, abo batūkolilwe ūkabapondaga soni.

⁸ A bise bene līīmi ji tūkwikumīlījaga kūlwa ng'wa Mulungu, nīyo ī lina lyako tūkūlīkumīlīja welelo bose.

⁹ Gwike ī haha watūponije, ūtūdooheleja; na a mabità gise ooyile ū kūdimana nago.

¹⁰ Watwītile tūūbapeela a banishi bise, a bilwisha bise būsola nding'wa.

¹¹ Watūfunije tūbize gītī ng'holo ja kūsīnzwa; hūna ūlola ūtūsalan'hanīja mu mahanga.

¹² A banhū bako wabagūgije mpango gūchile, ūtapandīkile solobo yose yose ū mu kūbagūja.

¹³ Watwenhelegije tūbize badalahwa kū bazenganwa; Ī haha tūlī ibengwe na babbyeedelejiwa ū kū banhū abo batūpīndije hose hose.

¹⁴ Watwenhelegije tūbize shigīmbo sha kwikala shikūhooyelagwa mu mahanga; a banhū bakūtūlolaga bayūshingisha mitwe.

¹⁵ Līīmi bbu nakwikalaga nagookile, ū būshū wane būfīkījiwe soni,

¹⁶ nguno ya kwineenelegejiwa na bibengeleja; kūlwa nguno ya ng'wanishi, ū maji wa shilī.

¹⁷ Pyī ī yose yenīyī yatūgwīlile, nūūlū īkī tūtaalī kūkwība na hado yaya, nūūlū tūtaalī kūleka kūlīdīlīla ī lilagane.

¹⁸ Ī ng'holò jise jitīnaagalūkīla kūngī, nūūlū ī mhambala jise jitaalī kwīnga mu nzīla yako.

¹⁹ Alīyo ū bebe watūpondagūlile ūtūleka kū mahalo ga majidīvī, hūna ūtūkundīkīja giiti sha gamha.

²⁰ Ūlū ni kūlyība ī lina lya ng'wa Mulungu wise, twamba makono gise kūlamya bamulungu bangī,

²¹ ū Mulungu ni atagūkungile ū mhayo gwenūyo? Nguno ū wei ajimanile ī mbisīla ja mu ng'holò.

²² Alīyo līīmi ji tūkūbūlagagwa kūlwa nguno yako, tūbalilwe gītī tūlī ng'holo ja kūsīnzwa.

²³ Ee Seeba, mishaga! Nibūlī ūlaalile? Būūkaga, ūtizūtūponya ilalī!

²⁴ Nibūlī ūbūbisile ū būshū wako, na a makoye gise ūtūgadīlīlaga, pyī nū wiboneelwa wise?

²⁵ Nguno ū būpanga wise būkūgalagajiagwa mu lūbuubu, nī mibīlī yise īlīluha mu masalū.

²⁶ Būūkaga wize ūtūgune, ūtūpīje kūlwa shigongo shako shitaale.