Zabuli 41 - Bibilia Ilagano Lya Kale 2015

Kūlomba mu makanza ga būsatu

Kūlwa ntongeeji wa bīmbi. Zabuli ya ng'wa Daūdi.

¹ Alī na lubango ūyo akadīlīlaga bahabī, ū SEEBA akūmpīja ū ng'wikanza lya makoye.

² Ū SEEBA akūūmalada, nū būpanga bokwe ūbūlang'hana; hama akūng'wīlūkīla ū mu sī; na atūntūūla mu kwikanwa kwa banishi bakwe.

³ Ū SEEBA akūnguzuhya nūūlū alī mu ndīlī asaatile, na akūngūngūmūla kūfuma ū mu būsaatū bokwe.

⁴ Ū nene nakahaya gīkī, “Ee SEEBA, nichīlage shigongo; nipījage, nguno nīītile shibi kūlī bebe.”

⁵ A banishi bane balīyūnihaya kībi no, “Ī gete ū ng'wenūyū akūcha nanalī lījimīīle ī lina lyakwe?”

⁶ Balīyiza kūnigīsha ūlū washika ū ng'wene, wayūyomba mihayo ītī na ntwe na magūlū, alīyo ū mu ng'holò akūsūmbyaga būlomolomo; alafumage a hanze wandya kūwalanya, būlī kwene ūko alībītīla.

⁷ Pye abo banikolilwe bakwikalaga bihwehwetela būnihaya; īyo bakūniiganikīlaga mibi no,

⁸ balīyiwīla, “Osaatile būsaatu būbi no, ndūhū atūbūūka aho alaalile henaho.”

⁹ Ī haha nū nwani ng'wichane ūyo naalī nansanije, ūyo walūlyaga shilīwa shane waniigalūkaga.

¹⁰ Alīyo, Ee SEEBA, nichīlage shigongo; nigūngūmūlage nabamalīle shiilī.

¹¹ Namanile gīkī ūniyegelile ū nene, h'ī chene ū ng'wanishi wane walemeelilwe ū kūninyalabīja.

¹² Ū bebe ūkūninhaga nguzu kūlwa būgololoku wa nhūngwa jane, hūna ūnitūūlile kwikala hamò nang'ho shikū ja welelo bose.

¹³ Akumīlījiwe ū SEEBA, ū Mulungu wa Baisilaeli; kūfuma welelo, na kūshisha welelo bose. Ee, Alichene.