Zabuli 4 - Bibilia Ilagano Lya Kale 2015

Kūlomba makanza ga mhīndī

Kūlwa ntongeeji wa bīmbi. Zabuli ya ng'wa Daūdi ya kwīmba na ndono jikūtūlagwa.

¹ Ee Mulungu wane ntūngīlīja, nigwage ūlū nalīkwitana. Ū mu makoye gane ūkanigunanha, nī haha nichīlage shigongo, ūkūdegeleke ū kūlomba kwane.

² Bing'we, ī likūjo lyane mukūlībala gītī shilī shikolo sha kwibengelejiwa kūshisha nanalī? Mukwikala mu mihayo īchile na kūgalūkīla būlomolomo kūshisha nanalī?

³ Alīyo managi gīkī, abo bang'ogohile ū SEEBA, benabo basolwa bakwe wei ng'wenekīlī; ū SEEBA akūniigwa ūlū nūng'witana.

⁴ Nūūlū mukapelana, ilang'hanagi mutizīīta shibi; ūlū mulī mu būlīīlī, huumūlagi ng'wigīsīlīje mu ng'holò jing'we.

⁵ Funyagi shitambò īsho shiigeleelilwe, na nsanyagi ū SEEBA.

⁶ Bingī bakūbūūjaga gīkī, “Nani ūyo akūtoolekeja ī yawiza?” Ee SEEBA, tūtwimīlage n'isana lya būshū wako.

⁷ Wanitūūlīlile būyegi wingī no ū mu ng'holò yane, kūtinda a boi ūlū balī na shīliwa shingī, na divai mhya.

⁸ Nakūlaala napandīke tūlo fuuku mu mhola, nguno Ee SEEBA, ūlī bebe wike ūyo ūkanilang'hanaga nikala mhola.