Zabuli 38 - Bibilia Ilagano Lya Kale 2015

Kūlomba ng'wikanza lya būluhi

Zabuli ya ng'wa Daūdi, kūlwikanza lya shakwinha sha kwizūkīja.

¹ Ee SEEBA, ūtizūnihama mu būpelanu wako; nūūlū ūtīzūnihūgūla mu būkalī wako.

² Nguno a masonga gako gaanilasile, nū nkono gwako gwanisheedekegije.

³ Kūlwa nguno ya būpelanu wako, Ī haha ū mu mīlī gwane ītīho mhola; nū mu maguha gane kūtīho kwifuula kūlwa nguno ya shibi shane.

⁴ Ī haha ū būkenaagūji bone būnikandīkīgije ū kū ntwe, būlī būdito no gītī nigo ūyo gūlīnilemeela ū kūgūbūūcha.

⁵ A malonda gane gabolile, nīyo galīnung'ha no kūlwa nguno ya būchilū wane.

⁶ Nose ū mīlī gwane gwigomile, naabizile wa kūguukuuba; nguno līīmi ji nakūshimīzaga niyinamīīlaga, nakūlījiagwa būpīna.

⁷ Ū nkīmbīlī gwane gūkūbugumaga no, ndūhū gete ī mhola ū mu mīlī.

⁸ Ī haha naatobagūkile gete, natī na nguzu nūūlū ja ngota; nakūlījiagwa mayanga ga mu ng'holò.

⁹ Ee Seeba, ī ng'hūmbū jane ī jose jimanīkile ū kū būtongi wako, nū kūgang'hīla kwane kūtibisile ū kūlī bebe.

¹⁰ Ī ng'holò yane īlītininhīla, Ī nguzu najo namalaga, nī lisana ū mu miso gane ī haha līlī jimijimi, natūbonaga nūūlū kī.

¹¹ A banwani bichane na a batogwa bane, baabizilūnipeela kūlwa nguno ya malonda gane; nose na a badūgū bane balīyīmīīla kasegeno.

¹² Abo bakūbūkoobaga ū būpanga bone, a bene balīyūnitega mitego yabo, hama abo balī na ng'hūmbū ja kūnigulaja a mahooya gabo galī mu kūnikenaagūla; līīmi ji bakūnidoselaga ya būlomolomo dūhū.

¹³ Alīyo ū nene nalī gītī gulu, ndūhū ū kūbigwa, nalī gītī munhū shimumu ūyo atalūngalūngaga.

¹⁴ Alichene, nalī gītī munhū ūyo atigwaga; ūyo nomo gwakwe gūtadūgije kūshosha mhayo.

¹⁵ Ee SEEBA, nakūlindile bebe; ū bebe Seeba Mulungu wane, hū ūkūshosha.

¹⁶ Nguno nalīhaya gīkī, “Ū lūpambala lwane ūlū lūchūūlūlūka, yaya ū kūbaleka bikumīlīje, nūūlū bayege mu kūnidalaha.”

¹⁷ Ī haha ū nene nalī bbihī kūgwa; nū būpīna wane būnigasīgije makanza gose.

¹⁸ Nalibūūla ū būkenaagūji wane, nalī na būpīna no kūlwa shibi shane.

¹⁹ A banishi bane kūlwa kūniboneela balī na nguzu no, nīyo abo banikolilwe na mhayo yaya, bene lwelwe ndo.

²⁰ Abo bakūnilīpaga yabūbi ū kū yawiza Īyo nakwīyītaga, balīyūnibyaagīja mihayo īkī nakwītaga yawiza.

²¹ Ee SEEBA, ūtizūnileka; yaya ū kūnisegenela Mulungu wane.

²² Nangūhīlage, ūnigune, Ee Seeba, ū bebe ūlī Mpīja wane.