Zabuli 36 - Bibilia Ilagano Lya Kale 2015

Būbi wa banhū na wiza bo ng'wa SEEBA

Kūlwa ntongeeji wa bīmbi. Zabuli ya ng'wa Daūdi ntūmami o ng'wa SEEBA.

¹ Ū būbi wa munhū wa malofu būkalūngalūngaga ū mu ng'holò yakwe, ū mu miso gakwe ndūhū logohano kūlī Mulungu.

² Nguno ū mu miso gakwe akilembagūlaga we ng'wenekīlī, ī shibi shakwe atūshiguguja na kūshikolwa.

³ Ī mihayo ya mu nomo gwakwe mibi no, hangī ya būlomolomo; atī na masala, atadūgije kwīta mitengeke.

⁴ Nūūlū alī mu būlīīlī, akwikala ūdosa ya malofu, akūkeeyula akwihelelaga kashimīzīle ka mu nhūngwa nsoso, ū būbi atabūlemaga.

⁵ Ee SEEBA, ī shigongo shako shitaale no, shishikile kū mapandī g'igūlū; nū wishigwa wako būkagije kū malunde.

⁶ Ū būtūngīlīja wako būbange ngūlū, būtī bo kūselengetiwa; ū wiza bo kalamulīle kako būlī būshimu no gītī būjiba bo nyanza. Ee SEEBA, ū bebe h'ūlī nang'hani wa banhū, nī shiinū.

⁷ Ee Mulungu, ū būtogwa wako ūbo būtī wa kūshila būlī wa mpango ntaale no, na lūūlū a banhū bakapeelelaga mu mbeho ya manana gako.

⁸ Bakahomondolaga shitoolyo mu numba yako, nī sha kūng'wa ūkabinhaga kūfuma mu mongo gwa shizeeze shako.

⁹ Nguno ū mulī bebe lūlīmo lūzwīlo lo būpanga, ū ng'wisana lyako tūkabonaga mo isana.

¹⁰ Abo bakūmanile ongejaga kūboolekeja ū būtogwa wako ūbo būtashilaga, nū būtūngīlīja wako a ba ng'holò jitūngīlīgije.

¹¹ Ū gūgūlū gwa ndooshi ūtizūgūleka gūnipande, nūūlū ū nkono gwa munhū wa malofu gūtizūnīnja.

¹² A ba malofu balīho basīnūkile būlambalala; balī hasī bisendekile, batīko kūbūūka hangī.