Zabuli 34 - Bibilia Ilagano Lya Kale 2015

Wiza bo ng'wa SEEBA

Zabuli ya ng'wa Daūdi aho wigīmbījaga kūbiza saji kū būtongi bo ng'wa Abimeleki, ūpeejiwa, wīnga.

¹ Nakūnkumīlīja ū SEEBA shikū jose; būlī gwa nakūnūmba na nomo gwane.

² Ū būpanga wane būkūyegela mulī SEEBA; abo baluhile ni bigwage bayege.

³ Nkumīlījagi SEEBA hamò nane; tūlīyegelagi ī lina lyakwe mu būsangī būmò.

⁴ Nakanīlīīla ū SEEBA ūnishokeja, ūnīnja ū mu boba wane pyī ū bose.

⁵ Abo bakanolaga we bakang'weka ng'wekaga; ū būshū wabo būtīko kūding'wa soni hangī.

⁶ Ū munhū wa kūpīnīhalīlwa ūyū, akalīla ū SEEBA ūng'wigwa, ūmpīja ū mu mayanga gakwe gose pye.

⁷ Ū malaika o ng'wa SEEBA akabakīngītīīlaga hose hose abo balī na logohano kūlī we, na akabapījaga.

⁸ Bing'we, lojagi ūmo alī ū SEEBA mukūbūbona ū wiza bokwe; alī na lubango ū wa kūpeelela kūlī we kūjūlang'hanwa.

⁹ Ng'ogohagi ū SEEBA, bing'we a beela bakwe; nguno abo bang'ogohīle we batī na sha kūbileba.

¹⁰ Nūūlū ī shimba jikīītaga jagayiwa, nīyo jikabītaga na kūdīīla nzala; alīyo abo bakankoobaga SEEBA, batagayiagwa ī shawiza.

¹¹ Bing'we baana, negeelagi munidegeleke; nakūmulanga ī ya logohano lwa ng'wa SEEBA.

¹² Nani ūyo alī na ng'hūmbū ja kūbiza mpanga, na atogilwe kūlama shikū ningī?

¹³ Lūlang'hanage ū lūlīmi lwako ū kū yabūbi, nū nomo gwako gūtizūyomba ya būlomolomo.

¹⁴ Galūkaga ūlekane nayo ī yabūbi, wīte yawiza; ūkoobe mhola, na wīlondeele gete.

¹⁵ A miso ga ng'wa SEEBA gabalolile a batūngīlīja, na a matū gakwe gakigwaga ū kūdaaya kwabo.

¹⁶ A bīīti ba mihayo yabūbi, ū SEEBA akapamanyaga nabo mu wilwisha, abakenaagūle gete; shigaye ū mu sī ī sha kwenheleja kūbizūkwa.

¹⁷ A batūngīlīja bakalīlaga ū SEEBA wabigwa, na akabapījaga ū mu makoye gabo gose.

¹⁸ Ū SEEBA alī hihī nabo abo balabūkile mu ng'holò, na akabapījaga abo bashetilwe mu myoyo.

¹⁹ Ū ntūngīlīja nūūlū akaluha na kinehe, alīyo ū SEEBA akampījaga kwinga mu yose pye.

²⁰ A maguha gakwe agalang'hanile pye a gose, nūūlū līmò lyago lītīko kūbīnzīka yaya.

²¹ Ū munhū wabūbi akabūlajiagwa būbi; na a babo batantogagwa ntūngīlīja bakūgwīlagwa nsango.

²² Ū SEEBA akabūkomoolaga ū būpanga wa batūmami bakwe; na a babo bakapeelelaga mulī we, atīho nūūlū ūmò wabo wa kūgwīlwa nsango.