Zabuli 32 - Bibilia Ilagano Lya Kale 2015

Kūlūmba kūlwa kūlekejiwa shibi

Zabuli ya ng'wa Daūdi. Lyīmbo.

¹ Alī na lubango ū wa kūlekejiwa būgomi bokwe, nī shibi shakwe shūkundīkījiwa.

² Alī na lubango ūyo SEEBA akūng'wisaaba gīkī atī na shibi, na būtīmo būlomolomo ū mu moyo gwakwe.

³ Ū mu shikū ījo nikalaga nahumūlile sele, a maguha gane gaalī gatī na nguzu kūlwa kwikala nakūgang'hīlaga līīmi tole.

⁴ Nguno ū nkono gwako gwikalaga gūnisheedekegije līīmi na būjikū; nose ī nguzu jane jalī jakamīīla, gītī būūmà mu shikū ja chū.

⁵ Alīyo nakibūūla nose ī shibi shane, noya ū kūbūbisa ū būsobya wane. Nūhaya, “Nakūng'wibūūlīla ū SEEBA ū būsobya bone.” Na ng'hana ūnilekeja ū būhūbi bo shibi shane.

⁶ Hūna lūūlū būlī ng'wene ūyo alī na logohano kūlī Mulungu, shing'wigeleelilwe akūlombe, kūko lītaalī līlīho ikanza lya kwilonga kwako; na ng'hana nūūlū lilonga ihūūma lya minzī mingī, ū ng'wenūyo gatūmpandīka.

⁷ Ū bebe ūl'ipandī lyane lya kūbūngīlà, ū mu makoye hū bebe ūkūnilang'hana, na kūnipīndya hose hose mīmbo ga būkomooji.

⁸ Ūkaniwīla, “Nakūkūlanga nī nzīla nūkoolekeja īyo īkwigeleelilwe kwībītīla; nakūkūganikīla nī shimīzīle yako nīlole.

⁹ Ūtizūbiza gītī falasa nūūlū nzobe nhaale, Ī jenījo jitī na masala, nose shiigelile jitungwe lijaamu na hataamu mu milomo; nguno ūlū ītī chene jitūdūla ū kūkūlondeela.”

¹⁰ Ū munhū wa nhūngwa jabūbi akagwīlagwa mayanga mingī; alīyo ū būtogwa bo ng'wa SEEBA ūbo būtī wa kūshila, būmpīndije ū munhū ūyo ansanije we.

¹¹ Bing'we a batūngīlīja, nyegelagi SEEBA na būyegi būtaale; bing'we bose abo ng'holò jing'we jigololokile, hamukagi na būyegi!