Zabuli 31 - Bibilia Ilagano Lya Kale 2015

Kūlomba na kūlūmba

Kūlī ntongeeji wa bīmbi. Zabuli ya ng'wa Daūdi.

¹ Ee SEEBA, Nakūsendamīlile bebe iyene, ūtizūnileka nakagooka, nipījage kūlwa būtūngīlīja wako.

² Nigalūkījage ū gūtū gwako ūniigwe, nangūhīlage ūnipīje. Bizaga shiganga shane sha kūpīlīla, numba ya nguzu ya kūbūngīlà.

³ Alichene, ū bebe īkī ūlī shiganga n'ipīlīlo lyane, nitongeelage; ūnilang'hane kūlwa lina lyako.

⁴ Nīnjage ū mu ntego ūyo nategilwe mu mbisīla, nguno ū bebe hū ūl'ipīlīlo lyane.

⁵ Nagūtūūla mu makono gako ū moyo gwane; nipījage Ee SEEBA, Mulungu nsanyiwa.

⁶ Nabakolilwe abo bakalamyaga shiikolile, alīyo ū nene ng'wene nansanije SEEBA.

⁷ Nakūyegela mu būtogwa wako nazalabane, nguno ū bebe ūbūbonile ū būluhi wane; na a makoye ga ng'holò yane ūgamanile.

⁸ Ūtanitūūlile mu nkono gwa ng'wanishi wane, alīyo wanitūūlile ha galī nīmīīla na magūlū gane.

⁹ Nichīlage shigongo, Ee SEEBA, nguno nalī mu makoye; nose a miso gane gaabbopomile kūlwa būpīna, nī ng'holò yane pyī nū mīlī shītī na nguzu.

¹⁰ Ū būpanga wane būlīkenaagūlwa būpīna, nī myaka yane īlīshila nalī mu kūgang'hīla; ī nguzu janishilīlile kūlwa būhūbi bone, hama ī haha a maguha gane gaagogolohile no.

¹¹ Ū kū banishi bane nalī ndalahwa kībi no, a bazenganwa bane nabo bakūniikangagwa; na a bimane bane baabizilūnogoha, nū mu nzīla a banhū balīyūnipeela.

¹² Boyile ū kūnizūkwa, nalī sumvwa na mfu; Ī haha natikīlile na līlūjo lya nungū.

¹³ Būlī kwene nakwigwaga bakwihwehwetelaga; kose kose nakīngilwe ya kūnogohya, bakūnilīīlaga gwīnda na kūnisīīga kūnibūlaga.

¹⁴ Alīyo ū nene nakūsanije bebe SEEBA; nahayile, “Ū bebe ūlī Mulungu wane.”

¹⁵ Ī shikū ja būlamu wane jilī mu makono gako; nipījage ū mu makono ga banishi bane, na a ga baluhya bane.

¹⁶ Ū ntūmami wako ng'wakījage ī lisana lya būshū wako; nipījage kūlwa shigongo shako.

¹⁷ Ee SEEBA, ūtizūnileka nakagooka, nguno nalīkūlīlīīla bebe; a bahūnga ni bagookage, leka baje kūlimu bakahuumūle sele kwenūko.

¹⁸ Ī milomo ya balomolomo ni īhuumūjiagwe, nguno bakītūmamīlaga mu būdooshi, kūhaya mihayo ya kūbadalaha a batūngīlīja.

¹⁹ Ū wiza wako būlī būtaale no, ūbo ūbabīkīlile abo bakogohile bebe; ūbo ūkawītaga mu būtongi wa banhū bose, abo bakapeelelaga kūlī bebe.

²⁰ Ū bebe h'ūlī būbīsīlo wabo ū kū mibi Īyo īkahelagwa na banhū mu mbisīla; ūkababisaga mu kaya yako bikala mhola, bayīngīle ī yombo.

²¹ Akumīlījiwe ū SEEBA, ūyo wanoolekegije shigongo shitaale gīko, aho naalī napīndiwe hose hose, gītī nzengo gūpīndiwe banishi.

²² Nakazwangana nūyoganya nalīhaya, “Naapulwa nīnjiwa ū kū būtongi wako!” Alīyo aho nakūlīlīīla gīkī ūnigune, ūliigwa ī lilaka lya kwikūmbīlīja kwane.

²³ Ntogagwi ū SEEBA, bing'we beela bakwe! Ū SEEBA akabalang'hanaga a basanyiwa, alīyo a bikumīlīja akabinhaga nsango ntaale.

²⁴ Bose abo mung'wisagīlilwe SEEBA, handatīlagi na kūtimbya ng'holò.