Zabuli 3 - Bibilia Ilagano Lya Kale 2015

Kūlomba mhola ng'wikanza lya kūkoyiwa

Zabuli ya ng'wa Daūdi, ng'wikanza lya kūmpeela ng'witūnja wakwe Abusalomu.

¹ Ee SEEBA, baakwīlile shido a banishi bane! Abo bakūnūūbūkīlaga balī bingī no!

² Bingī bakwiwīlaga balīnihaya gīkī, “Ū Mulungu atīko ū kūnguna ū ng'wenūyo.”

³ Alīyo ū bebe SEEBA ūnikīngītīīlile gītī lūmūda, ūl'ikūjo lyane na ngūngūhya wane.

⁴ Ū nene nakanīlīīlaga ū SEEBA n'ilaka lya higūlya, nang'hwe akanishokejaga kūfuma mu lūgūlū lwakwe lwela.

⁵ Ūlū nalaala nakapandīkaga tūlo, nū kūmisha nakamishaga, nguno ū SEEBA ngunanhi wane.

⁶ Natīko kūbogoha a banhū abo banipīndije mhandī jose, mabità makūmi ga shihūmbī.

⁷ Būūkaga Ee SEEBA! Ee Mulungu wane, nipījage! Nguno pye a banishi bane wabatūlile kū saya; a bahūnga wababīnzagūlile a mino.

⁸ Ū būpīji būlī bo ng'wa SEEBA, Ī mbango jako ni jibizage kū banhū bako.