Zabuli 29 - Bibilia Ilagano Lya Kale 2015

Ilaka lya ng'wa SEEBA līlī na būdūla

Zabuli ya ng'wa Daūdi.

¹ Ng'winhagi ū SEEBA, bing'we baana ba ng'wa Mulungu, ū SEEBA ng'winhagi ikūjo na nguzu.

² Ū SEEBA ng'winhagi ikūjo īlo ligeleelilwe kū lina lyakwe. Namyagi ū SEEBA mu wiza w'ikūjo lyakwe.

³ Ī lilaka lya ng'wa SEEBA līlī higūlya ya minzī, ū Mulungu w'ikūjo akapalalūkaga; ū SEEBA akapalalūkaga higūlya ya minzī mingī.

⁴ Ī lilaka lya ng'wa SEEBA līlī na būdūla, Ī lilaka lya ng'wa SEEBA līlī na būdūla wa nyatemi.

⁵ Ī lilaka lya ng'wa SEEBA līkabīnzagūlaga mikoola. Ū SEEBA akabīnzagulaga mikoola ya Lebanoni.

⁶ Ī Lebanoni akīyītaga kūsata gītī ndīlanha, nī Silioni gītī ndama ya mbushi.

⁷ Ī lilaka lya ng'wa SEEBA līkalabyaga ndabi ja lūkūba.

⁸ Ī lilaka lya ng'wa SEEBA līkatinginyaga matogolo, ū SEEBA akalīdetemyaga ī litogolo lya Kadeshi.

⁹ Ī lilaka lya ng'wa SEEBA līkenhelejaga laala kūbyala, na līkapuugaga mapoolu. Hama pyī ī shose īsho shilī mu hekalu yakwe shikahelelekejaga; shilīhaya, “Akumīlījiwe.”

¹⁰ Ū SEEBA igashije nyatemi hīgūlya ya mahūūma ga minzī; ū SEEBA igashije h'isumbī lya būtemi welelo bose.

¹¹ Ū SEEBA akabinhaga nguzu a banhū bakwe; ū SEEBA akabīīlūkīlaga na mhola a banhū bakwe.