Zabuli 27 - Bibilia Ilagano Lya Kale 2015

Lyīmbo lya koolecha kūnsanya SEEBA

Zabuli ya ng'wa Daūdi.

¹ Ū SEEBA al'isana lyane na būpīji wane; nakūng'ogoha nani? Ū SEEBA al'ibūngīlò lya būpanga wane, nani akūnidetemya?

² A banhū babūbi ūlū biza kūnūūbūkīla balīkooba kūnimila, a banishi na a biboneeji bane ūlū biza kūnidumīla, bakwipama bagwe.

³ Nūūlū nakapīndiwa mabità kose kose, Ī ng'holò yane ītūbbaha; pyī nūūlū nūūbūkilwa būlūgū, na hene nakwikala mu kūsanya.

⁴ Ū SEEBA nanombile mhayo gūmò, ū gwenūyo hū nakūgūkooba, nikale mu numba ya ng'wa SEEBA pyī ī shikū ja būlamu bone, nabūlole ū wiza bo ng'wa SEEBA; nikale nakwideedeng'hanyaga ū mu hekalū yakwe.

⁵ Nguno ū mu lūshikū lwa makoye akūnibisa mu wikalo bokwe; akūnibisa mu mbeho y'iheema lyakwe, akūnikīndīka higūlya ya shiganga.

⁶ Hūna ū ntwe gwane gūkūgūngūhiwa higūlya ya banishi bane, abo banigobanīlile hose hose; hama ū ng'wiheema lyakwe nakūmfunīja shitambò mu būyegi na kūtūla mhūndū; nakwīmba mu būyegi nangongoole ū SEEBA.

⁷ Ee SEEBA, liigwage ī lilaka lyane ūlū nakūlīlaga; nichīlage shigongo, ūniidīke.

⁸ Aho wahaya, “Būkoobage ū būshū wane.” Ī ng'holò yane yūkūshokeja gīkī, “Ee SEEBA, Ū būshū wako nakūbūkooba.”

⁹ Lekaga ū kūnibisa ū būshū wako, ūtizūng'wayīga mu būpelanu ū ntūmami wako; ū bebe h'ūlī ngunanhi wane. Ee Mulungu wa būpīji wane, yaya ū kūnigumanīja, ūtizūnīība.

¹⁰ Ū baba nū mayū baamala kūnileka, alīyo ū SEEBA akūnanukūla.

¹¹ Ee SEEBA, nilangage a kashimīzīle kako, nīyo īkī nalī na banishi, nitongeelage mu nzīla īlenganīlile.

¹² Ūtizūnitūūla mu makono ga banishi bane banīītīle ūmo batogelilwe, nguno bakaanīji balomolomo baanibūūkīīlile, bakūniheezelelaga mu kūniiboneela.

¹³ Gwike nalī na kūsanya gīgī, ū wiza bo ng'wa SEEBA nakūbūbona ū kū sī ya bapanga.

¹⁴ Ng'wisagīlagwe SEEBA; handīkīīlaga nīyo ūtimbye ng'holò. Alichene, ng'wisagīlagwe ū SEEBA.