Zabuli 26 - Bibilia Ilagano Lya Kale 2015

Kūdaaya kwa ntūngīlīja

Zabuli ya ng'wa Daūdi.

¹ Yoolechage ī ng'hana yane, Ee SEEBA; nguno nakashimīzaga mu nhūngwa jigoloolile, nīyo ū SEEBA nansanije jigi, na nataalī kūlelengeta.

² Ee SEEBA, nigemage ūnilole; Īgīsīlījage ī ng'holò yane na a maganiko gane.

³ Nguno ū būtogwa wako būlī kū būtongi bone shikū jose, na būlī gwa nakashimīzīlaga mu ng'hana yako.

⁴ Natikalaga nūhooya na banhū balomolomo, nūūlū natī na gwīnda na bibeeleleja.

⁵ Nagakolilwe no a magele ga banhū babūbi; nīyo a bakenaagūji natatogagwa ū kūhooya nabo.

⁶ Ee SEEBA, nakakalabaga geela a makono gane, hūna naja ū kū ng'walīlo gwako,

⁷ kūnū nakwīmbaga n'ilaka lyīmbo lya būgongooji, na kūshikumūcha ī shītīle shako sha kūkumya.

⁸ Ee SEEBA, nabūtogilwe ū wikalo wa mu numba yako; ī lipandī ūmo ikūjo lyako līkikalaga.

⁹ Ī ng'holò yane ūtizīkūmbanīja hamò na banhū ba shibi, nūūlū ū būpanga wane hamò na babūlagi;

¹⁰ banhū abo bakīītaga mihayo ya malofu na makono gabo, abo nkono gwabo gwa būlyo gookalile sha kūhongwa.

¹¹ Alīyo ū nene nakashimīzīlaga mu nhūngwa jitūngīlīgije, nikomoolage, nichīlage shigongo.

¹² Ū nene nīmīīlile na magūlū gane ha lenganīzu, nakūnkumīlīja ū SEEBA mu kwibilinga kūtaale.