Zabuli 25 - Bibilia Ilagano Lya Kale 2015

Kūlomba kūtongeelwa na kūlang'hanwa

Zabuli ya ng'wa Daūdi.

¹ Ū būpanga wane nalībūtūūla kūlī bebe, Ee SEEBA.

² Nakwisagīlilwe bebe, Ee Mulungu wane, ūtizūnilekanīja nakagwa mu magooke. Nūūlū ūtizūbaleka a banishi bane banipyene.

³ Ūtizūneka ose ose ūyo akūsendamīlile bebe, agwe mu magooke, a bijomboki mu nyasala sala ni bagookage.

⁴ Ee SEEBA, noolekejage ī nzīla jako, nilangage a kajīīle kako.

⁵ Nitongage ū mu ng'hana yako, ūnilange; nguno ū bebe h'ūlī Mulungu wa būpīji wane, būl'ikanza nakūsendamīlile bebe.

⁶ Ee SEEBA, shiizūkagwe ī shigongo shako, nū būtogwa wako ūbo būtashilaga, nguno shilī shaho kūfuma kale na kale.

⁷ Ūtizūshiizūkwa ī shibi sha ha būdinha bone, nūūlū ū būshitiigwa bone; niizūkagwe kūlenganīla na būtogwa wako, Ee SEEBA, kūlwa wiza wako.

⁸ Ū SEEBA alī wawiza na ntūngīlīja, hūna lūūlū a bashibi akabalangaga ī nzīla jakwe.

⁹ A bidohya akabatongaga mu ya ng'hana, nīyo akabalangaga ī nzīla yakwe.

¹⁰ Ī nzīla ja ng'wa SEEBA ī jose, jilī būtogwa na ng'hana ū kū banhū abo badimile ilagane lyakwe, na būkaanīji bokwe.

¹¹ Kūlwa lina lyako Ee SEEBA, nilekejage ū būsobya wane, nguno būlī būtaale no!

¹² Munhū kī ūyo ang'ogohile SEEBA? Ū ng'wenūyo h'ūyo akūntonga ū mu nzīla īyo akwīsola.

¹³ Ū ng'wenūyo ū būpanga bokwe būkwikala mu kwifuula, hanuma ī sī īkūbiza wingīji ū kū shibyalīle shakwe.

¹⁴ Ū SEEBA abasanije abo balī na logohano kūlī we, a benabo h'abo akabamanīkījaga Ī lilagane lyakwe.

¹⁵ A miso gane ganolile SEEBA makanza gose, nguno hū ng'wene akūjīnja mu ntego ī mhambala jane.

¹⁶ Nigalūkīlage ūnichīle shigongo, nguno nalī n'ilundu, na naluhile no.

¹⁷ A makoye ga mu ng'holò yane galongeja ū kūkūla, nitaligūlage ūnīnje ū mu būpīna bone.

¹⁸ Būlolage ū būluhi bone na a makoye gane, ūnilekeje ī shibi shane pyī ī shose.

¹⁹ Balolage a banishi bane ūbone ūmo balī ū wingī, nū mumo banikolilwe mu kakolelwe kabūbi.

²⁰ Būlang'hanage ū būpanga bone, ūnipīje; ūtizūnileka nakagwa mu magooke, nguno nalīpeelela mūlī bebe.

²¹ Būshikanu na būtūngīlīja h'īsho shinilang'hane, nguno nakwisagīlilwe bebe.

²² Ee Mulungu, bapījage a Baisilaeli ū mu makoye gabo gose pye.