Zabuli 24 - Bibilia Ilagano Lya Kale 2015

SEEBA ng'wene Ntemi w'ikūjo

Zabuli ya ng'wa Daūdi.

¹ Ī sī īlī ya ng'wa SEEBA, nī shose īsho shilīmo; sī jose na jose na a bikaji baamo bose pye.

² Nguno ayītūūlile higūlya ya nyanza yīmīīla, ayīkīndīkile ha minzī yūdaama.

³ Nani ūyo adūgije kūlinha mu lūgūlū lwa ng'wa SEEBA? Nani wa kūgima kwīmīīla ng'wipandī lyakwe lyeela?

⁴ Al'ūyo shītwa shakwe shilī shawiza, nī ng'holò yakwe ībize neela; munhū ūyo būpanga bokwe atabūtūmamīlaga kū mihayo ya sagala, nūūlū atilahīlaga mu kūlemba lemba.

⁵ Ū ng'wenūyo akwanūkūla kūfuma kūlī SEEBA, na akūbalīlwa būtūngīlīja kūfuma kūlī Mulungu wa būpīji wakwe.

⁶ Hū'ūmo shilī ī shibyalīlwe shabo abo bakankoobaga; abo bakabūkoobaga ū būshū wako, Ee Mulungu o ng'wa Yakobo.

⁷ Bing'we mibita, būūchagi ī mitwe ying'we; na a bing'we milyango ya kale lugūkagi ingīle ū Ntemi w'ikūjo.

⁸ Ū Ntemi w'ikujo, hū nani? Hū ng'wene ū SEEBA wa nguzu na būdūla, ū SEEBA ūyo alī wa būdūla mu būlūgū.

⁹ Bing'we mibita, būūchagi ī mitwe ying'we; na a bing'we milyango ya kale lugūkagi, ingīle ū Ntemi w'ikūjo.

¹⁰ Ni nani ū Ntemi w'ikūjo ng'wenūyū? Hū ng'wene ū SEEBA wa būdūla bose. Ū ng'wenūyo h'ū Ntemi w'ikūjo.