Zabuli 19 - Bibilia Ilagano Lya Kale 2015

Milīmo ya ng'wa Mulungu na mhayo gwakwe

Kūlwa ntongeeji wa bīmbi. Zabuli ya ng'wa Daūdi.

¹ Ī ligūlū līkakumūchaga ikūjo lya ng'wa Mulungu, līkīyoolechaga hape ī milimo ya makono gakwe;

² a makanza ga līīmi līkakumūchaga ya līīmi, ū mu būjikū bose na bose lyoolekeja būmani.

³ Katīho kalūngalūngīle nūūlū lūtīho lūlīmi, ūko lītaalī kwigwiwa ī lilaka lyenīlo.

⁴ Nīyo ī lilaka lyenīlo līsambaalile hose pyī ū mu sī, ī mihayo yalyo īshikile kū būkalīkījo wa sī. Ū kwigūlū kwenūko alībeegegije wikalo ī līīmi,

⁵ Īlo līkapulukaga gītī ntooji akūfumaga mu maji yakwe, na gītī mpyeni wayegaga kūlwa kwingīla mu wigusha bo nhambo ja kwishiga.

⁶ Līkapulukaga kwīngīīla lwandī lūmò lwa būkalīkījo w'igūlū, lyaselema līlībīta mu nzīla yalyo, lyashika nū kū būkalīkījo ū būngī; na shitīho shose shose īsho shidūgije kūwibisa ū būsebu walyo.

⁷ Ī shilagīlo sha ng'wa SEEBA shene shishikanu, shikawifuujaga ū būpanga wa banhū. Ū būkaanīji bo ng'wa SEEBA būlī bo kūsanyiwa, būkabinhaga masala a bachilūchilū.

⁸ A malange ga ng'wa SEEBA gatūngīlīgije, gakatūūlaga būyegi mu ng'holò; ī shilagīlo sha ng'wa SEEBA shilī sheela, shikatūūlaga isana mu miso ga banhū.

⁹ Ū logohano lwa ng'wa SEEBA lūlī lwela, lūlī lwa kūshinga ho shikū ja welelo bose; ū būlamuji bo ng'wa SEEBA būlī bo ng'hana, nīyo pyī ū bose būtūngīlīgije.

¹⁰ Būlī na mpango ntaale kūtinda zahabu, alichene, kūtinda zahabu neela h'ūmo jikwīlīle, hama būlī būnonu no kūtinda būūkī, kūtinda būūkī bo ng'wilela.

¹¹ Ū ntūmami wako akahūgūlagwa mu nzīla yasho; ū mu kūshidima ī shenīshi īlīmo mheela nhaale.

¹² Nani ūyo adūgije kūwitegeleja ū būbi bokwe? Nīngījage ū būbi ūbo wibisile mulī nene, neele.

¹³ Ū ntūmami wako nang'hanage, atizūgwa mu shibi bo makaala, shitizūnisuga ū nene; a henaho hū nakūbiza nshikanu, natī na kwihīga mu būhūbi būtaale.

¹⁴ Ī mihayo ya kūfuma mu nomo gwane, nū kwideedeng'hanya kwa mu ng'holò yane, shanukūlwe ū kū būtongi wako, Ee SEEBA, Shiganga shane na Nkomooji wane.