Zabuli 15 - Bibilia Ilagano Lya Kale 2015

Kwikala hamò na Mulungu

Zabuli ya ng'wa Daūdi.

¹ Ee SEEBA, nani ūyo adūgije kwikala ū mu numba yako? Nani adūgije kūtūūla ng'hambī mu lūgūlū lwako lwela?

² Al'ūyo atī na shisembo mu kashimīzīle kakwe, ūyo akīītaga ya būtūngīlīja, ūyo akayombaga ya ng'hana kūfuma mu ng'holò yakwe,

³ nū lūlīmi lwakwe lūtalembekejaga, nūūlū atang'wītīlaga mibi nzenganwa ng'wiye; hama nūūlū ng'wiye ataamilījaga isū ibi,

⁴ abize atatogagwa kwikala wiloleelaga ba nhūngwa ja malofu. Alīyo abakūgije abo bang'ogohile SEEBA; nūūlū wilahīla mhayo atagalūchaga maganiko ūlū ūgwīlwa makoye.

⁵ Hangī abize atagobbiishaga hela jakwe kūlwa kūkooba solobo, alemile nūūlū kūhongwa, gīkī iboneele munhū atī na būbi. Ūyo akīītaga ī yenīyī atīko kūtinginyiwa.