Zabuli 147 - Bibilia Ilagano Lya Kale 2015

Kūng'wīmbīla na kūnkūja SEEBA

¹ Nkumīlījagi SEEBA, īlī chiza no ū kwīmba mīmbo ga kūnkumīlīja ū Mulungu wise. Igeleelilwe ū kūkumīlījiwa, ū gwenūyo gūlī mhayo gwawiza.

² Ū SEEBA hū ng'wene ū nzengi wayo Ī Yelusalemu, h'ūyo akabakobyaga a Baisilaeli ūko basambaalīlile.

³ Akabapījaga abo bagwile ng'holò, wagatunga a magulaagīje gabo.

⁴ Ī lisaabu lya wingī wa sonda alītūūlile we, nīyo ajimanile būlī yene na lina lyayo.

⁵ Ū SEEBA wise ng'wene ntaale, nū būdūla wakwe būkīlanīgije; ū būmani wakwe būtī na lūbīmbī.

⁶ Ū SEEBA akabaguzuhaja a bidohya, alīyo a bakenaagūji akabataalīkaga hasī.

⁷ Ng'wīmbīlagi ū Seeba munūmbe, ng'wīmbīlagi ū Mulungu wise kūnū mukūtūlaga na ndono.

⁸ Hū ng'wene akalīfīkījaga malunde ī ligūlū, nī sī akīyenhelaga mbula; na a maswa akagazwishaga wei ū mu ngūlū.

⁹ Ī shiinū akajinhaga wei ī shilīwa, pyī na a makune ga ng'hūngūūlū ūlū gaalīla.

¹⁰ Atayejiagwa nguzu ja falasa, na atasendamīlile būdūla bo magūlū ga munhū;

¹¹ ū SEEBA abayegelile a banhū abo bang'ogohile we, abo basendamīlile būtogwa bokwe ūbo būtī bo kūshila.

¹² Ee Yelusalemu, nkumīlījage ū SEEBA, Ee Sayuni nkumīlījage ū Mulungu wako.

¹³ Nguno hū ng'wene akīguzuhyaga ī mibita ya mizengo yako, na a banhū bako akabīīlūkīlaga wei.

¹⁴ Hū ng'wene akatūūlaga mhola ū kū mbīmbī jako, na akakwinhaga mhona ya shilīwa shawiza.

¹⁵ Ī sī akītūmīlaga būlagīji wakwe, ū mhayo gwakwe gwaja gūkūpeelaga gilibanda.

¹⁶ Hū ng'wene akasambaajaga seluji hasī yeeleleja gītī būlūba, nū lūme akalwitaga gītī mabu.

¹⁷ Akenhaga mbula yakwe ya mawe mataale gītī ngogoto, nani ūyo akūlwīmīla ū lūnīlī lwa nyaga gwakwe?

¹⁸ Akagatūmīlaga mhayo gwakwe gaabiwa, walagīla nyaga gwakwe gwahemba, a minzi gahūūma gajile.

¹⁹ Ū mhayo gwakwe akang'olekeja ū Yakobo, ūng'winha ū Isilaeli ī shilagīlo na a kahelele kakwe.

²⁰ Ataalī kwīta gīko kwihanga līngī lyose lyose, nguno a gene gatabūmanile ū būlamuji wakwe. Nkumīlījagi SEEBA.