Zabuli 146 - Bibilia Ilagano Lya Kale 2015

Ū SEEBA alī Mpīja nsanyiwa

¹ Nkumīlījagi SEEBA, Ee būpanga wane, nkumīlījage SEEBA.

² Nakūnkumīlīja ū SEEBA mu būlamu wane bose, aho nataalī nalī mpanga nakwīmba kūlwa kūngongoola ū Mulungu wane.

³ Lekagi ū kūbasendamīla a basugi ba mu sī, balī banhū dūhū abo batadūgije kwenha būpīji.

⁴ Ī myūyī ya ng'wa munhū ūlū yīnga, akashokaga mu malongo ga hasī; ū mu lūshikū lwenūlo pyī īyo ayīhelile Īkakalīkaga.

⁵ Alī na lubango ūyo ngunanhi wakwe alī Mulungu o ng'wa Yakobo, ūyo kwisagīlwa kwakwe kūlī mulī SEEBA Mulungu wakwe;

⁶ ūyo alī Meeja w'igūlū na sī, pye na a manyanza nī shose īsho shilīmo; ūyo alī nsanyiwa wa shikū jose ilalī.

⁷ Hū ng'wene akabalamulaga mu būtūngīlīja abo bakiboneelagwa, na a babo balī mu makoye ga nzala akabinhaga Ī shilīwa. Ū SEEBA akabatungūlaga abo balī mu būtungwa.

⁸ Ū Seeba akabinhaga kūbona a babboku, akabagūngūmūlaga abo bagung'humile; ū SEEBA abatogilwe a batūngīlīja.

⁹ Ū Seeba ababaladile a bageni, na akabinhaga nguzu abo batī na basaabo na a bachīlwa; alīyo ī nzīla ja bahūnga akajikenaagūlaga.

¹⁰ Ū SEEBA hū ng'wene ū Nsugi wa shikū ja welelo bose, ū Mulungu wako, Ee Sayuni, hū ng'wene ū Nsugi mu shibyalīlwe shose pye. Nkumīlījagi SEEBA.